வாணியம்பாடியில் அடுத்தடுத்து நிரம்பிய 3 ஏரிகள்- உபரிநீரை மலர்தூவி வரவேற்ற விவசாயிகள்

திருப்பத்தூர்

தொடர் மழையின் காரணமாக வாணியம்பாடி சுற்றுவட்டார பகுதிகளில் உள்ள ஏரிகள் நிரம்பியதால் மகிழ்ச்சி அடைந்துள்ள விவசாயிகள், ஏரியில் வழிந்து ஓடும் நீருக்கு கற்பூரம் ஏற்றி, மலர் தூவி வரவேற்றனர்.

திருப்பத்தூர் மாவட்ட வாணியம்பாடி ஆலங்காயம் மற்றும் அதன் சுற்றுவட்டார பகுதிகளில், நிவர் மற்றும் புரெவி புயல் காரணமாக கடந்த 2 வாரங்களாக தொடர் மழை பெய்து வந்தது. மழையின் காரணமாக நீர்வரத்து அதிகரித்ததால், 4 ஆண்டுகளுக்கு பின் வளையம்பட்டு ஊராட்சிக்குட்பட்ட உப்பு கானாறு ஏரி நிரம்பியது. இதனால் அந்த ஏரியில் இருந்து நீர்வரத்து பெறும் லாலா ஏரி மற்றும் பொதுப்பணித்துறை கட்டுப்பாட்டில் உள்ள துளசிபாய் ஏரியும் நிரம்பியுள்ளது.

இதன் மூலம் லாலா ஏரி, வளையம்பட்டு, கிரிசமுத்திரம், மாராப்பட்டு உள்ளிட்ட பகுதியில் உள்ள சுமார் 2 ஆயிரம் ஏக்கர் விவசாய நிலங்கள் பாசன வசதி பெறும். துளசிபாய் ஏரி நிரம்பியதால் மகிழ்ச்சி அடைந்துள்ள அந்தபகுதி விவசாயிகள் மற்றும் பொதுமக்கள், ஏரியில் இருந்து வழிந்தோடும் உபரிநீருக்கு கற்பூரம் ஏற்றியும், மலர்களை தூவியும் வரவேற்றனர்.