எழுதி வச்சுக்கோங்க.. 1 மாதத்தில் 90% அதிமுகவினர் தவெக-விற்கு வருவார்கள்..! - அமைச்சர் ஆதவ் அர்ஜுனா..!

 By ttn desk May 28, 2026, 13:10 IST1779954043130
1

தவெகவுக்கு மாற்று கட்சியினர் வருவது ஏன் என்பது குறித்து அமைச்சர் ஆதவ் அர்ஜுனா கருத்து தெரிவித்துள்ளார்.

தவெக பிற கட்சி எம்.எல்.ஏ-க்களைப் பேரம் பேசி இழுப்பதாகக் கூறப்படும் குற்றச்சாட்டுகளுக்குப் பதிலளித்த அவர், "எந்தவொரு சட்டமன்ற உறுப்பினரையும் தவெக 'ஆஃபர்' கொடுத்து, ஆசை காட்டி அழைக்கவில்லை. அப்படியான அரசியல் செய்யும் தலைமை எங்களுக்கு கிடையாது. எங்களின் நேர்மையான கொள்கை மற்றும் தவெக தலைமை மீது கொண்டுள்ள நம்பிக்கையின் காரணமாகவே அவர்கள் தானாக முன்வந்து இணைகிறார்கள்" என்று விளக்கமளித்தார்.

மேலும், தவெகவில் இணையும் மாற்று கட்சியினருக்கு தங்களது சொந்தக் குடும்ப உறுப்பினர்களைப் போல முழு மரியாதையும், அங்கீகாரமும் வழங்கப்படுவதாகவும், பழிவாங்கும் எண்ணம் இல்லாத ஒரு தூய்மையான அரசியல் தவெகவில் மட்டுமே சாத்தியம் என்றும் அவர் பெருமிதத்துடன் குறிப்பிட்டார். 

அதிமுக பொதுச்செயலாளர் எடப்பாடி பழனிசாமியின் சுயநல முடிவுகள் அனைத்தும் அதிமுகவின் அடிமட்ட தொண்டர்களின் மனநிலைக்கு எதிராக இருந்ததால் தான் அக்கட்சிக்கு இந்தத் தோல்வி நிலை ஏற்பட்டது என்றார். மேலும், தேர்தல் முடிவுகளுக்குப் பிறகு வெறும் 47 எம்.எல்.ஏ-க்களை வைத்துக் கொண்டு இபிஎஸ் மீண்டும் முதலமைச்சராக முயன்றதாகவும், அதற்காகத் திரைமறைவில் திமுக - அதிமுக இணைந்து கூட்டணி ஆட்சி அமைக்க நடந்த ரகசிய சூழ்ச்சியை முதலாவதாக எதிர்த்ததே இடதுசாரிகள் (கம்யூனிஸ்டுகள்) தான் என்றும் அவர் அதிரடிக் குற்றச்சாட்டை முன்வைத்தார்.

திமுகவின் இந்த ஆதிக்க அரசியலும், கூட்டணி கட்சிகள் மீது அவர்கள் செலுத்திய அழுத்தமும், இபிஎஸ்ஸின் ரகசிய நகர்வுகளும் தான் உண்மையான அதிமுக தொண்டர்களிடையே தங்களது தலைமை மீது பெரும் அதிருப்தியை உருவாக்கியதாக அவர் சாடினார்.திமுக தனது கூட்டணிக் கட்சிகள் மீது ஆதிக்கம் செலுத்தியதும், இபிஎஸ் திமுகவுடன் கூட்டணி வைக்க முயன்றதும் தான் உண்மையான அதிமுக தொண்டர்களிடையே தங்களது தலைமை மீது கடுமையான அதிருப்தியை உருவாக்கியதாக அமைச்சர் ஆதவ் அர்ஜுனா சுட்டிக்காட்டினார்.

"மக்களால் மூன்றாவது இடத்திற்குத் தள்ளப்பட்ட அதிமுகவின் தற்போதைய தலைமை நேர்மையாக இல்லை. புரட்சித் தலைவர் எம்.ஜி.ஆர் காட்டிய மக்கள் நல வழியில் தற்பொழுது உண்மையாக நடந்துகொண்டிருப்பது தவெக மட்டும்தான். தவெக ஆட்சியில் ஊழலும், கமிஷன் கலாச்சாரமும் முற்றிலுமாக ஒழிக்கப்பட்டுள்ளது. இதை உணர்ந்துதான் 90 சதவீத அதிமுக தொண்டர்கள், திமுகவின் ஆதிக்கத்தை ஒழித்துக் கட்ட தவெகவுடன் கைகோர்க்கத் தயாராகிவிட்டார்கள்.

நான் சொல்வதை வேண்டுமானால் இப்போதே எழுதி வைத்துக் கொள்ளுங்கள்; இன்னும் ஒரே மாதத்திற்குள் அதிமுகவின் 90 சதவீத நிர்வாகிகள் தவெகவை நோக்கி வந்துவிடுவார்கள். அதற்கான வேண்டுகோளை அவர்கள் முன்கூட்டியே தவெக தலைமைக்கு அனுப்பிவிட்டார்கள். தமிழக அரசியலின் உண்மையான எதிர்காலம் தவெகதான்!"

தமிழக அரசியலில் தவெக அமைச்சரின் இந்த அதிரடிப் பேச்சு, தற்பொழுது அரசியல் வட்டாரங்களில் மிகப்பெரிய விவாதப் பொருளாக மாறியுள்ளது.


 

From around the web