வேதாந்தா குழுமத்தின் தலைவர் அனில் அகர்வாலின் மகன் மரணம்..!

வேதாந்தா குழுமத்தின் தலைவர் அனில் அகர்வாலின் மூத்த மகன் அக்னிவேஷ் அகர்வால் (49), அமெரிக்காவில் ஏற்பட்ட விபத்தைத் தொடர்ந்து உயிரிழந்தார். இந்தத் துயரச் செய்தியை அனில் அகர்வால் தனது சமூக வலைதளப் பக்கத்தில் உருக்கமாகப் பகிர்ந்துள்ளார்.

அக்னிவேஷ் அகர்வால் அமெரிக்காவில் பனிச்சறுக்கு (Skiing) விளையாட்டில் ஈடுபட்டிருந்தபோது எதிர்பாராத விதமாக விபத்தில் சிக்கிப் படுகாயமடைந்தார். இதற்காக நியூயார்க்கில் உள்ள மருத்துவமனையில் அனுமதிக்கப்பட்டு தீவிர சிகிச்சை பெற்று வந்தார். சிகிச்சை பலனின்றி, திடீரென ஏற்பட்ட மாரடைப்பு காரணமாக அவர் உயிர் பிரிந்தது.

அக்னிவேஷ் அகர்வாலின் பொறுப்புகள்

வேதாந்தா குழுமத்தின் முக்கியப் பொறுப்புகளை கவனித்து வந்த அக்னிவேஷ் அகர்வால், பின்வரும் பதவிகளை வகித்து வந்தார்:

• தல்வண்டி சபோ பவர் லிமிட்டட் (Talwandi Sabo Power Limited): இந்நிறுவனத்தின் தலைவராகச் செயல்பட்டு வந்தார்.

• நிர்வாகக் குழு உறுப்பினர்: வேதாந்தா குழுமத்தின் பல்வேறு துணை நிறுவனங்களில் நிர்வாக உறுப்பினராகப் பணியாற்றி, குழுமத்தின் வளர்ச்சிக்கு முக்கியப் பங்காற்றினார்.

இந்த தகவலை அனில் அகர்வால் தனது எக்ஸ் தளத்தில் உருக்கமாக பதிவிட்டுள்ளார். அனில் அகர்வால் தனது எக்ஸ் தளத்தில் பதிவிட்டுள்ளதாவது: -

இன்று என் வாழ்வின் இருண்ட நாள். என் அன்பு மகன் அக்னிவேஷ், எங்களை விட்டு மிக விரைவாகப் பிரிந்து சென்றுவிட்டார். அமெரிக்காவில் பனிச்சறுக்கு விளையாட்டின்போது ஏற்பட்ட விபத்தைத் தொடர்ந்து, நியூயார்க் மருத்துவமனையில் சிகிச்சைப் பெற்று குணமடைந்து வந்தார்.

மோசமான நிலை கடந்துவிட்டது என்று நாங்கள் நம்பிக்கையுடன் இருந்தோம். ஆனால் விதி வேறு விதமான திட்டங்களை வைத்து இருந்தது. திடீரென ஏற்பட்ட மாரடைப்பு எங்கள் மகனை எங்களிடமிருந்து பறித்துவிட்டது. தன் குழந்தைக்கு விடை கொடுக்க வேண்டிய ஒரு பெற்றோரின் வலியை விவரிக்க வார்த்தைகளே கிடையாது. நாங்கள் ஈட்டும் வருமானத்தில் 75 சதவீதத்துக்கும் அதிகமானதை சமூகத்திற்குத் திருப்பித் தருவதாக அக்னியிடம் நான் உறுதியளித்திருந்தேன். இன்று, அந்த வாக்குறுதியை நான் புதுப்பித்து, இன்னும் எளிமையான வாழ்க்கையை வாழத் தீர்மானிக்கிறேன்” என உருக்கமாக கூறியுள்ளார்.