தவெக மாநாட்டிற்கு நிலம் கொடுத்த விவசாயிகளுக்கு விருந்து அளித்தார் விஜய்!

விக்கிரவாண்டி மாநாட்டிற்கு நிலம் அளித்து உதவிய விவசாயிகளுக்கு தமிழக வெற்றி கழகத்தின் தலைவர் விஜய் விருந்து வைத்தார்.  

தமிழ் சினிமாவின் முன்னணி நடிகரான விஜய், தமிழக வெற்றி கழகம் என்ற பெயரில் அரசியல் கட்சியை தொடங்கியுள்ளார். இவர் தலைமையில் கடந்த சில நாட்களுக்கு முன்னர் விழுப்புரம் மாவட்டம் விக்கிரவாண்டியில் மாபெரும் மாநாடு நடைபெற்றது. இந்த மாநாட்டில் தமிழக வெற்றி கழகத்தின் தலைவர் விஜய் அக்கட்சியின் கொள்கை மற்றும் கோட்பாடுகளை அறிவித்தார். மேலும் 2026ம் ஆண்டு நடைபெறவுள்ள சட்டமன்ற தேர்தலில் தன்னுடன் கூட்டணி அமைப்பவர்களுக்கு ஆட்சியிலும் பங்கு, அதிகாரத்திலும் பங்கு என அறிவித்தார். விஜயின் இந்த அறிவிப்பு பல்வேறு அரசியல் கட்சிகளையும் ஈர்த்தது. இதனை தொடர்ந்து அவர் கட்சி பணிகளை மும்முரமாக கவனித்து வருகிறார். 

இந்த நிலையில், விக்கிரவாண்டி மாநாட்டிற்கு நிலம் அளித்து உதவிய விவசாயிகளுக்கு அக்கட்சியின் தலைவர் விஜய் விருந்து வைத்தார்.  விக்கிரவாண்டியில் நடைபெற்ற தவெகவின் முதல் மாநாட்டிற்கு நிலம் அளித்து உதவிய விவசாயிகளுக்கு நன்றி தெரிவிக்கும் விதமாக, சென்னை பனையூரில் உள்ள அக்கட்சியின் தலைமை அலுவலகத்தில் அவர்களுக்கு தவெக தலைவர் விஜய் விருந்து அளித்தார்.