ஆடுகளுக்கு புல் அறுக்க சென்ற சிறுவர்களுக்கு நேர்ந்த சோகம் : உயிருக்குப் போராடும் இரு சகோதரர்கள்!

உத்தரப் பிரதேச மாநிலம் பிஜ்னோர் மாவட்டம், ஷேர்கோட் காவல் எல்லைக்குட்பட்ட வாஜித்ஜ்பூர் கிராமத்தில், சட்டவிரோதமாகக் கொட்டப்பட்ட பட்டாசு கழிவுகள் வெடித்துச் சிதறியதில், ஆடுகளுக்கு தீவனம் சேகரிக்கச் சென்ற சகோதரர்கள் இருவரும் படுகாயமடைந்து உயிருக்கு ஆபத்தான நிலையில் மருத்துவமனையில் அனுமதிக்கப்பட்டுள்ளனர்.

வாஜித்ஜ்பூர் கிராமத்தை சேர்ந்த சந்திரவீர் சிங் என்பவரது மகன்கள் ரோஹித் (16) மற்றும் ரோஹன் (12). இவர்கள் இருவரும் ஞாயிற்றுக்கிழமை மாலை சுமார் 5:30 மணியளவில், தங்கள் ஆடுகளுக்கு புல் அறுப்பதற்காக மிதிவண்டியில் வனப்பகுதியை நோக்கிச் சென்றுள்ளனர். வழியில் இயங்காமல் கைவிடப்பட்ட பழைய செங்கல் சூளை ஒன்றின் அருகே அவர்கள் சென்றபோது, அங்கே கொட்டப்பட்டிருந்த பட்டாசு கழிவுகள் திடீரென பலத்த சத்தத்துடன் வெடித்துச் சிதறின. இந்த வெடிவிபத்தின் சத்தம் அப்பகுதி முழுவதையும் உலுக்கியது.

வெடிச்சத்தம் கேட்டு அருகில் உள்ள வயல்களில் வேலை செய்து கொண்டிருந்த கிராம மக்கள் உடனடியாகச் சம்பவ இடத்திற்கு விரைந்து வந்தனர். அங்கு உடல் முழுவதும் தீக்காயங்களுடன், ரத்த வெள்ளத்தில் வலியால் துடித்துக் கொண்டிருந்த இரு சிறுவர்களையும் கண்டு அதிர்ச்சியடைந்தனர். உடனடியாக காவல்துறையினருக்கு தகவல் தெரிவித்த மக்கள், சிறுவர்களை மீட்டு அருகில் உள்ள சமூக சுகாதார மையத்தில் (CHC) சேர்த்தனர்.

அங்கு முதலுதவி சிகிச்சை அளிக்கப்பட்ட நிலையில், சிறுவர்களின் நிலைமை மிகவும் கவலைக்கிடமாக இருந்ததால் மேல் சிகிச்சைக்காக பிஜ்னோர் மாவட்ட மருத்துவமனைக்கும், அதைத் தொடர்ந்து மீரட் மருத்துவக் கல்லூரி மருத்துவமனைக்கும் (Meerut Medical College) மருத்துவர்கள் அவர்களைப் பரிந்துரைத்தனர்.

இதுகுறித்து கிழக்கு மண்டல கூடுதல் காவல் கண்காணிப்பாளர் (ASP East) ஏ.கே.ஸ்ரீவஸ்தவா கூறுகையில், "சமீபத்தில் மாவட்டத்தில் பட்டாசு ஆலைகளில் நடத்தப்பட்ட அதிரடி ஆய்வுகளுக்குப் பயந்து, அந்த ஆலை நிர்வாகத்தினர் தங்கள் கழிவுகளை இந்த செங்கல் சூளை அருகே சட்டவிரோதமாகப் மறைத்து வைத்திருந்தது முதற்கட்ட விசாரணையில் தெரியவந்துள்ளது" என்றார்.

இச்சம்பவம் குறித்துத் தீவிர விசாரணை நடைபெற்று வருவதாகவும், சம்பந்தப்பட்ட பட்டாசு ஆலையின் உரிமம் மற்றும் கையிருப்புப் பட்டியல்கள் ஆய்வு செய்யப்பட்டு, குற்றவாளிகள் மீது கடும் சட்டப்பூர்வ நடவடிக்கை எடுக்கப்படும் என்றும் மாவட்ட ஆட்சியர் (DM) ஜஸ்ஜித் கவுர் தெரிவித்துள்ளார்.