தண்ணீரும் இல்லை... கரண்ட்டும் இல்லை! டெல்டா விவசாயிகளின் வாழ்வாதாரம் என்னவாகும்..? - இபிஎஸ் கேள்வி..!

 By ttn desk Jun 13, 2026, 05:10 IST1781307642000
1

மேட்டூர் அணையின் பாசன நீரை மட்டுமே நம்பி டெல்டா மாவட்டங்களில் சுமார் 16.05 லட்சம் ஏக்கர் விளைநிலங்கள் விவசாயப் பணிகளை மேற்கொண்டு வருகின்றன. ஒவ்வொரு ஆண்டும் ஜூன் மாதம் 12-ஆம் தேதி தொடங்கி அடுத்த ஆண்டு ஜனவரி மாதம் 28-ஆம் தேதி வரை மேட்டூர் அணையில் இருந்து தொடர்ச்சியாகப் பாசனத்திற்குத் தண்ணீர் திறந்து விடுவது வழக்கம்.ஆனால் இம்முறை அது நடக்கவில்லை.

தற்போதைய நிலவரப்படி, மேட்டூர் அணையில் நீர் திறப்பதற்குத் தேவையான 90 அடிக்குக் குறைவாக, அதாவது வெறும் 79.62 அடி மட்டுமே தண்ணீர் இருப்பு உள்ளது. அதே வேளையில், அணைக்கான தினசரி நீர்வரத்தும் வெறும் 424 கன அடியாக மிகக் குறைந்த அளவிலேயே வந்து கொண்டிருக்கிறது. இந்த அணைக்கு வரும் நீர்வரத்து எதிர்பார்த்ததை விடக் மிக மோசமாகக் குறைந்ததன் காரணமாகவே, இந்த 2026-ஆம் ஆண்டிற்கான நீர் இன்று திட்டமிட்டபடி திறந்து விடப்படவில்லை. மேட்டூர் அணை உரியக் காலத்தில் திறக்கப்படாத இந்த இக்கட்டான சூழ்நிலையால், டெல்டா மாவட்டங்களின் குறுவை சாகுபடிப் பணிகள் முற்றிலும் முடங்கிப் போகும் பேராபத்து உருவாகியுள்ளது. 

இந்நிலையில், மேட்டூர் அணை திறக்கப்படாததால் குறுவை சாகுபடி பாதிக்கப்பட்டுள்ள நிலையில், விவசாயக் கடன்களைத் தள்ளுபடி செய்யாமலும் மின்சார நேரத்தைக் குறைத்தும் அரசு ஏமாற்றுவதாக எடப்பாடி பழனிசாமி குற்றம் சாட்டியுள்ளார்.  

அதிமுக பொதுச்செயலாளர் எடப்பாடி பழனிசாமி தனது அதிகாரப்பூர்வ எக்ஸ் (X) சமூக வலைத்தளப் பக்கத்தில் தமிழக அரசுக்கு எதிராகக் கடுமையான கண்டனப் பதிவு ஒன்றை வெளியிட்டுள்ளார். அதில், ஆண்டுதோறும் ஜூன் 12-ஆம் தேதி தவறாமல் திறக்கப்படும் மேட்டூர் அணை, இந்த ஆண்டு திறக்கப்படாதது ஒட்டுமொத்த தமிழக விவசாயிகளையும் பெரும் அதிர்ச்சியிலும், மீளாத் துயரிலும் ஆழ்த்தியுள்ளது என்று குறிப்பிட்டுள்ளார். டெல்டா பகுதியின் குறுவை சாகுபடியானது மேட்டூர் அணையில் இருந்து திறந்து விடப்படும் காவிரித் தண்ணீரை மட்டுமே முழுக்க முழுக்க நம்பி இருப்பதால், இந்த ஜூன் 12 நீர் வெளியீடு என்பது விவசாயிகளுக்கு மிகவும் வாழ்வா சாவா பிரச்சினையாகும் என்று சுட்டிக்காட்டியுள்ளார்.

ஏற்கனவே தேர்தல் வாக்குறுதியில் சொன்னபடி விவசாயிகளின் கூட்டுறவுப் பயிர்க்கடன் என்ற பெயரில் நிலுவையில் இருக்கும் ரூ.10,000 கோடிக்கும் மேற்பட்ட ஒட்டுமொத்தக் கடன் தொகைகளையும் முழுமையாகத் தள்ளுபடி செய்யாமல், கடுகளவுக் கடனை மட்டும் அடைப்பதாகக் கூறி விவசாயிகளை இந்த அரசு ஏமாற்றியுள்ளது என்று எடப்பாடி பழனிசாமி சாடியுள்ளார். இதனால் வாழ்வாதாரத்தை இழந்த விவசாயிகளைப் போராட்டக் களத்திற்குத் தள்ளிவிட்டுள்ள இன்றைய அரசு, தற்போது அணையையும் திறக்காமல் அதற்கு மாற்றாக ரூ.134 கோடிக்குக் குறுவை சிறப்புத் தொகுப்புத் திட்டம் என்ற பெயரில் மற்றுமொரு கண்துடைப்பு மற்றும் ஏமாற்று அறிவிப்பை வெளியிட்டு மக்களை திசைதிருப்பப் பார்க்கிறது என்று குற்றம் சாட்டியுள்ளார்.

முந்தைய அதிமுக ஆட்சிக்காலத்தில் விவசாயிகளின் நலனைக் கருத்தில் கொண்டு அறிவிக்கப்பட்டபடி, பம்பு செட்டுகளுக்கு 24 மணி நேரமும் தடையற்ற மும்முனை மின்சாரம் (3-Phase Power) தங்கு தடையின்றி வழங்கப்பட்டு வந்தது என்று எடப்பாடி பழனிசாமி நினைவு கூர்ந்துள்ளார். ஆனால், அதனைத் தற்போது தற்போதைய அரசு 18 மணி நேரமாகக் குறைத்து அதிகாரப்பூர்வமாக அறிவித்துள்ளது விவசாயிகளுக்குச் செய்த துரோகமாகும் என்று சாடியுள்ளார். இதுமட்டுமன்றி, மாநிலம் முழுவதும் தற்பொழுது நிலவி வரும் அறிவிக்கப்படாத தொடர் மின்வெட்டு காரணமாக, மின்சாரம் இல்லாததால் விவசாயிகள் தங்களது சொந்தப் பம்பு செட்டுகளைக் கூட இயக்க முடியாத ஒரு அவல நிலை நிலவி வருகிறது என்று சுட்டிக்காட்டியுள்ளார். இத்தகைய இக்கட்டான சூழலில், விவசாயிகளின் வலிகளையும், அவர்களின் அன்றாட வேதனைகளையும் கொஞ்சம்கூடப் புரிந்து கொள்ளாமல் தற்போதைய அரசு ஒரு வெற்று ஏமாற்று அறிவிப்பை மட்டும் வெளியிட்டு வேடிக்கை பார்க்கிறது என்று அவர் விமர்சித்துள்ளார். எனவே, விவசாயிகள் வாழ்வாதாரம் சம்பந்தப்பட்ட இந்த விவகாரத்தின் தீவிரத்தை அரசு உடனடியாக உணர்ந்து, மேட்டூர் அணையில் இருந்து எப்படியாவது தண்ணீரைத் திறந்து அது டெல்டாவின் கடைமடைப் பகுதி வரை தடையின்றிச் சென்றடைவதற்கான அனைத்துப் போர்க்கால நடவடிக்கைகளையும் உடனடியாக மேற்கொள்ள வேண்டும் என இந்த அரசைத் தான் வலியுறுத்திக் கேட்டுக்கொள்வதாக எடப்பாடி பழனிசாமி தனது பதிவில் குறிப்பிட்டுள்ளார்.



 

From around the web