சம்மன் அனுப்பியும் ஆஜராகாத இருட்டுக்கடை அல்வா உரிமையாளர் மருமகன்!

நெல்லை இருட்டுக்கடை அல்வா நிறுவன உரிமையாளர் மகள் வரதட்சணை புகார்  விவகாரத்தில் மணமகன் தரப்பில் இன்று பாளையங்கோட்டை அனைத்து மகளிர் போலீஸ் ஸ்டேஷனில் வழக்கறிஞர் ஆஜரானார்.

நெல்லையில் உலகப் பிரசித்தி பெற்ற இருட்டுக்கடை அல்வா கடையை நடத்தி வருபவர் கவிதா சிங். இவரது மகள் கனிஷ்கா. இவருக்கும் கோவையைச் சேர்ந்த தொழிலதிபர் மகன் பல்ராம் சிங்கிற்கும் பிப்ரவரி 2ஆம் தேதி நிலையில் பிரமாண்டமாக திருமணம் நடைபெற்றது. இதை அடுத்து திருமணமான 40 நாட்களில் கனிஷ்கா தனது கணவர் மற்றும் மாமனார் குடும்பத்தினர் வரதட்சனை கேட்டு கொடுமைப்படுத்துவதாகவும், ரூ .1.5 கோடி மதிப்பிலான விலை உயர்ந்த காரை வரதட்சணையாக கேட்பதாகவும், இருட்டுக்கடை அல்வா நிறுவனத்தின் உரிமையை தனது பெயரின் மாற்றி தர வேண்டும் எனவும் கொலை மிரட்டல் விடுகின்றனர் என கனிஷ்கா மற்றும் அவரது தாய் கவிதா சிங் ஆகியோர் சில தினங்களுக்கு முன் நெல்லை மாநகர கமிஷனர் அலுவலகத்தில் புகார் தெரிவித்தனர். இதைத் தொடர்ந்து கோவையில் கனிஷ்காவின் புகாருக்கு மறுப்பு தெரிவித்து மணமகன் பல்ராம் சிங் தரப்பில் தெரிவிக்கப்பட்டது.

இந்நிலையில் இந்த கனிஷ்கா கொடுத்த புகார் அடிப்படையில் பாளையங்கோட்டை அனைத்து மகளிர் போலீசார் இன்று காலை 11:00 மணிக்கு பல்ராம் சிங் தரப்பில் நேரில் ஆஜராக வேண்டும் என 2 நாட்களுக்கு முன்பு போலீசார் சம்மன் அனுப்பினர். இதையடுத்து இன்று காலை கனிஷ்கா தரப்பிலான வழக்கறிஞர்கள் பாளையங்கோட்டை அனைத்து மகளிர் போலீஸ் ஸ்டேஷனில் குவிந்தனர். ஆனால் 11 மணி வரை பல்ராம் சிங் தரப்பில் யாரும் ஆஜராகவில்லை. காலை 11:30 மணிக்கு பல்ராம் சிங் தரப்பில் வழக்கறிஞர் பரிமளம் என்பவரின் உதவியாளர் போலீஸ் ஸ்டேஷனில் ஆஜராகி பல்ராம் சிங் தரப்பினர் தொழில் மற்றும் வியாபாரம் சம்பந்தமாக 10 நாட்கள் அவகாசம் கேட்டு காவல் நிலையத்தில் அவகாசம் கேட்டு காவல் நிலையத்தில் மனு அளித்துள்ளனர். காவல்துறையினர் உயர் அதிகாரியிடம் பேசி பதில் தருவதாக தெரிவித்திருப்பதாகவும் மேலும் 10 தினங்களுக்குள் ஆஜராக வேண்டும் எனவும் கூறப்படுகிறது.