நீதிமன்றம் அதிரடி..! விபத்தில் கணவன் மற்றும் மகளை இழந்த பெண்ணுக்கு ரூ.1.60 கோடி இழப்பீடு..!

By ttn desk May 17, 2026, 05:25 IST1778975716000

சென்னை வில்லிவாக்கம் பகுதியைச் சேர்ந்த பாஸ்கர் (61), கடந்த 2023ஆம் ஆண்டு மே 14ஆம் தேதி தனது மனைவி ஜோதிகா (49) மற்றும் மகள் ஷோபிகா (26) ஆகியோருடன் திருப்பத்தூர் மாவட்டம் ஏலகிரியில் இருந்து காரில் சென்னை நோக்கி பயணம் செய்தார். அப்போது இருங்காட்டுக்கோட்டை சிப்காட் அருகே வந்தபோது, அதே பாதையில் வந்த ஐச்சர் சரக்கு லாரி திடீரென கட்டுப்பாட்டை இழந்து கார் மீது மோதி விபத்து ஏற்பட்டது.

இந்த விபத்தில் பாஸ்கரும், அவரது மகள் ஷோபிகாவும் பலத்த காயமடைந்து உயிரிழந்தனர். ஜோதிகா படுகாயமடைந்த நிலையில் மருத்துவமனையில் சிகிச்சை பெற்று பின்னர் வீடு திரும்பினார்.

இதையடுத்து, தனது கணவர் உயிரிழப்புக்கு ரூ.1.78 கோடி, மகள் உயிரிழப்புக்கு ரூ.49 லட்சம் மற்றும் தனக்கு ஏற்பட்ட காயங்களுக்கு ரூ.80 லட்சம் இழப்பீடு வழங்கக் கோரி ஜோதிகா சென்னை மோட்டார் வாகன விபத்து இழப்பீடு தீர்ப்பாயத்தில் தனித்தனியாக 3 வழக்குகளைத் தொடர்ந்தார்.

இந்த வழக்குகளை விசாரித்த சென்னை சிறு வழக்குகளுக்கான முதன்மை நீதிமன்ற நீதிபதி ஏ.நசீர் அகமது, ‘இந்த விபத்து சரக்கு லாரி ஓட்டுநரின் கவனக்குறைவு, அலட்சியப் போக்கு மற்றும் அதிவேகத்தால் நிகழ்ந்துள்ளது..

உயிரிழந்த பெண் மருத்துவர் தனியார் மருத்துவமனையில் ரூ. 1.14 லட்சம் ஊதியம் வாங்கி வந்துள்ளார். மருந்தகம் நடத்தி வந்த பாஸ்கர் மாதம் ரூ. 50 ஆயிரம் சம்பாதித்துள்ளார். காயமடைந்த மனுதாரரான ஜோதிகாவும் தன் பங்குக்கு ரூ. 20 ஆயிரம் வரை சம்பாதித்து வந்துள்ளார்.

இந்த விபத்துக்கு கார் ஓட்டுநரின் அதிவேகமே காரணம் என்ற சரக்கு லாரி காப்பீடு செய்யப்பட்ட தனியார் இன்சூரன்ஸ் நிறுவனத்தின் வாதம் ஏற்புடையதல்ல. மனுதாரர் இந்த விபத்தில் தனது மகள் மற்றும் கணவரை பறிகொடுத்ததுடன் மட்டுமல்லாது அவரும் 34 சதவீதம் அளவுக்கு ஊனமடைந்துள்ளார்.

எனவே அவரது மகளின் இறப்புக்கு ரூ. 1 கோடியே 29 லட்சத்து 89 ஆயிரத்து 800, கணவரின் இறப்புக்கு ரூ. 17 லட்சத்து 24 ஆயிரம், மனுதாரருக்கு ஏற்பட்ட பாதிப்புக்கு ரூ. 13 லட்சத்து 58 ஆயிரத்து 300 என மொத்தம் ரூ. 1 கோடியே 60 லட்சத்து 72 ஆயிரத்து 100--ஐ தனியார் இன்சூரன்ஸ் நிறுவனம் 7.5 சதவீத வட்டியுடன் வழங்க வேண்டும்’ என உத்தரவிட்டுள்ளார்.