அ.தி.மு.க. அதிக வாக்குகள் பெறும் பகுதிகளில் உள்ள முகவர்களுக்கு தலா 1 பவுன் தங்கக் காசு - முன்னாள் அமைச்சர் தங்கமணி..!

சட்டமன்ற தேர்தல் நெருங்கும் வேளையில், நிர்வாகிகளையும் தொண்டர்களையும் உற்சாகப்படுத்தும் வகையில் 'தங்கக் காசு' பரிசு அறிவிப்புகள் அ.தி.மு.க.வினர் மத்தியில் பெரும் வரவேற்பைப் பெற்றுள்ளது. 

நாமக்கல் மாவட்டத்தில் எந்தெந்த வாக்குச்சாவடிகளில் (Booths) அ.தி.மு.க. அதிகப்படியான வாக்குகளைப் பெற்று முதலிடம் பிடிக்கிறதோ, அந்தந்தப் பகுதிக்கு உட்பட்ட வாக்குச்சாவடி முகவர்களுக்கு அ.தி.மு.க. சார்பில் தலா 1 பவுன் தங்கக் காசு வழங்கப்படும் என்று தங்கமணி அதிரடியாக அறிவித்தார்.

வாக்குச்சாவடி முகவர்கள் அனைவரும் வரும் தேர்தலில் அ.தி.மு.க.வின் வெற்றியை உறுதி செய்யத் தீவிரமாகப் பணியாற்ற வேண்டும் என்றும், ஒவ்வொரு வாக்காளரையும் நேரில் சந்தித்து அ.தி.மு.க அரசின் முந்தைய சாதனைகளை எடுத்துக்கூற வேண்டும் என்றும் அவர் அறிவுறுத்தினார். குறிப்பாக, இளைஞர்கள் மற்றும் புதிய வாக்காளர்களைக் கவரும் வகையில் களப்பணி அமைய வேண்டும் என்று வலியுறுத்தினார்.

உட்கட்சிப் பூசல்களைத் தூக்கியெறிந்துவிட்டு, கட்சியின் பொதுச்செயலாளர் எடப்பாடி பழனிசாமி அவர்களின் தலைமையின் கீழ் அனைவரும் ஓரணியில் நின்று ஒற்றுமையுடன் செயல்பட வேண்டும் என்று நிர்வாகிகளைக் கேட்டுக்கொண்டார். தமிழகத்தில் தற்போது நிலவும் விலைவாசி உயர்வு மற்றும் சட்டம்-ஒழுங்கு பிரச்னைகள் குறித்து பேசிய அவர், மக்கள் தற்போது மாற்றத்தை விரும்புவதாகவும், அந்த மாற்றத்தை அ.தி.மு.க.வால் மட்டுமே தர முடியும் என்றும் தனது உரையில் குறிப்பிட்டார்.