தளபதி விஜய் நீங்க இப்படி பேசலாமா ? இப்படி உளறி வச்சு இருக்காரே..
புதுச்சேரியில் நடைபெற்ற தவெக பொதுக்கூட்டத்தில், தலைவர் விஜய் ரேஷன் கடைகள் குறித்துப் பேசிய சில தகவல்கள் தவறானவை என்றும், பொய்யானவை என்றும் கடுமையான விமர்சனங்கள் வைக்கப்பட்டு வருகின்றன. குறிப்பாக, "இந்திய அளவில் ரேஷன் கடைகளே இல்லாத இடம் புதுச்சேரிதான்" என்று அவர் பேசியது உண்மையல்ல.
உண்மையில், புதுச்சேரியில் சுமார் எட்டு ஆண்டுகளுக்குப் பிறகு, கடந்த 2024 ஆம் ஆண்டு முதல் ரேஷன் கடைகள் மீண்டும் செயல்படத் தொடங்கியுள்ளன. பொது விநியோகத் திட்டத்தைச் சார்ந்த குடும்பங்களுக்கு இந்தக் கடைகள் மூலம் இலவச அரிசி மற்றும் சர்க்கரை மீண்டும் கிடைப்பதால், மக்கள் இந்த முடிவை மிகுந்த மகிழ்ச்சியுடன் வரவேற்றுள்ளனர்.
முன்னதாக, 2016 ஆம் ஆண்டில் காங்கிரஸ் ஆட்சியில் வழங்கப்பட்ட அரிசியின் தரம் குறித்துப் புகார்கள் எழுந்தபோது, அப்போதைய துணைநிலை ஆளுநர் கிரண் பேடிக்கும் மாநில அரசுக்கும் மோதல் ஏற்பட்டது. இதன் விளைவாக, ஆளுநர் அரிசி விநியோகத்தைத் தடை செய்தார். பின்னர் மத்திய அரசின் உத்தரவின் பேரில், அரிசிக்கான தொகை பயனாளிகளின் வங்கிக் கணக்குகளில் நேரடிப் பணப் பரிமாற்றம் மூலம் செலுத்தப்பட்டது. 2019 ஆம் ஆண்டுக்குள் அனைத்து ரேஷன் கடைகளும் முழுமையாக மூடப்பட்டு, மக்கள் சந்தையில் அதிக விலை கொடுத்து அரிசி வாங்கும் நிலைக்குத் தள்ளப்பட்டனர்.
அரிசி விலை உயர்வு காரணமாக ஏழைக் குடும்பங்கள் பெரிதும் சிரமப்பட்டதால், ரொக்கப் பரிமாற்றம் போதுமானதல்ல என்றும், ரேஷன் கடைகளில் மீண்டும் அரிசி விநியோகம் தொடங்க வேண்டும் என்றும் மக்கள் தொடர்ச்சியாகக் கோரினர். கடந்த மக்களவைத் தேர்தலின்போது பொதுமக்கள் முதலமைச்சர் என். ரங்கசாமியிடம் இது குறித்துக் கேள்வி எழுப்பவே, அரிசி விநியோகம் விரைவில் மீண்டு வரும் என அவர் உறுதியளித்தார்.
முதலமைச்சர் அளித்த வாக்குறுதிப்படி, புதுச்சேரி அரசு 2024 ஆம் ஆண்டில் ரேஷன் கடைகளை மீண்டும் திறந்து, இலவச அரிசி மற்றும் சர்க்கரை விநியோகத்தைத் தொடங்கியது. மாதந்தோறும் ரேஷனை நம்பியிருக்கும் லட்சக்கணக்கான குடும்பங்களுக்கு நிம்மதி அளிக்கும் வகையில், எட்டு ஆண்டுகளுக்குப் பிறகு ரேஷன் கடைகள் மீண்டும் திறக்கப்பட்டது ஒரு முக்கியமான மைல்கல்லாகக் கருதப்படுகிறது. ஆனால், இந்த முக்கிய நிகழ்வு குறித்துத் தெரியாமல் விஜய், புதுச்சேரியில் ரேஷன் கடைகளே இல்லை என்று பேசியிருப்பது தவறான தகவல் என விமர்சனம் எழுந்துள்ளது.