ஸ்மார்ட் மீட்டருக்கான டெண்டர் அறிவிப்பு- 3 கோடி ஸ்மார் மீட்டர் கொள்முதல்

மின் இணைப்புகளில் ஸ்மார்ட் மீட்டர் பொருத்துவதற்காக சுமார் 20 ஆயிரம் கோடி செலவில் 3 கோடி ஸ்மார்ட் மீட்டர்களை கொள்முதல் செய்ய தமிழ்நாடு மின் பகிர்மான கழகம் டெண்டர் கோரியுள்ளது. 

வீடுகள் உள்ளிட்ட மின் இணைப்புகளில் மின் நுகர்வை துல்லியமாக கணக்கெடுக்கவும், மின்இழப்பை தடுக்கவும், மின்கணக்கீட்டில் நிகழும் முறைகேடுகளை தடுத்து வருவாயை அதிகரிக்கும் நோக்கில் ஸ்மார்ட் மீட்டர் பொருத்த அனைத்து மாநில மின்வாரியங்களையும், ஒன்றிய அரசு அறிவுறுத்தி வருகிறது. மேலும், 2026-ம் ஆண்டுக்குள் ஸ்மார்ட் மீ்ட்டர் திட்டத்தை நிறைவேற்ற வேண்டும் என காலக்கெடு நிர்ணயித்துள்ளது. இதன்படி, தமிழ்நாடு மின் பகிர்மான கழகம் ஸ்மார்ட் மீ்ட்டர்களை பொருத்த முடிவு செய்தது. 

இதன்படி, சுமார் 20 ஆயிரம் கோடி செலவில் 3 கோடி ஸ்மார்ட் மீட்டர்களை கொள்முதல் செய்ய தமிழ்நாடு மின் பகிர்மான கழகம் டெண்டர் கோரியுள்ளது. இதன்படி, 19,992 கோடி செலவில் 3,04,86, 617 ஸ்மார்ட் மீட்டர்கள் கொள்முதல் செய்யப்பட உள்ளது.  குறிப்பாக, சென்னை, வேலூர் மண்டலத்தில் 49.43 லட்சம், கோவை, ஈரோடு மண்டலத்தில் 56.74 லட்சம் ஸ்மார்ட் மீட்டர்களும், காஞ்சிபுரம், விழுப்புரம் மண்டலங்களில் 49.61 லட்சம் ஸ்மார்ட் மீட்டர்களும், கரூர், நெல்லை மண்டலங்களில் 49.98 லட்சம் ஸ்மார்ட் மீட்டர்களும், திருச்சி, தஞ்சாவூர் மண்டலங்களில் 49.86 லட்சம் ஸ்மார்ட் மீட்டர்களும், மதுரை, திருவண்ணாமலை மண்டலங்களில் 49.77 லட்சம் ஸ்மார்ட் மீட்டர்களும் பொருத்தப்பட உள்ளது.  இன்னும் ஒரு மாதத்தில் டெண்டர் தொடர்பான நடவடிக்கைகள் இறுதி செய்யப்பட்டு விரைவில் ஸ்மார்ட் மீட்டர் பொறுத்தும் பணிகள் தொடங்கும் என்று மின்வாரிய அதிகாரிகள் தெரிவித்தனர். 6 கட்டமாக நிறுவப்படும் ஸ்மார்ட் மீட்டருக்கான டெண்டர் அறிவிப்பை வெளியிட்டுள்ளது தமிழ்நாடு மின் வாரியம். ஏற்கனவே 4 கட்டமாக ஸ்மார்ட் மீட்டர் அமைக்க அதானி குழுமத்துடனான டெண்டர் ரத்து செய்யப்பட்ட நிலையில் தற்போது மீண்டும் டெண்டர் கோரப்பட்டுள்ளது.