தமிழக பாஜக தலைவர் அண்ணாமலையின் அசையும் அசையா சொத்துக்கள்.. முழு விவரம்!

மக்களவைத் தேர்தலில் தமிழகம் மற்றும் புதுச்சேரியில் மொத்தம் 20 தொகுதிகளில் பாஜக நேரடியாக போட்டியிடுகிறது. மற்ற 20 தொகுதிகளில் கூட்டணி கட்சிகள் போட்டியிடுகின்றன. பாஜக கூட்டணியில் பாமக, தமிழ் மாநில காங்கிரஸ், அமமுக, புதிய நீதிக் கட்சி, இந்திய ஜனநாயக கட்சி, தமிழக மக்கள் முன்னேற்ற கழகம் ஆகிய கட்சிகள் போட்டியிடுகின்றன. முன்னாள் முதல்வர் ஓ பன்னீர்செல்வம் பாஜக ஆதரவு சுயேச்சை வேட்பாளராக போட்டியிடுகிறார்.

இந்நிலையில் கோவை தொகுதியில் போட்டியிடும் அண்ணாமலை வேட்பு மனுத்தாக்கல் செய்தார். அவர் தாக்கல் செய்துள்ள பிரமாண பத்திரத்தில் தனது சொத்து விவரங்களை குறிப்பிட்டுள்ளார். அதன்படி பாஜக தமிழக தலைவரும் கோவை மக்களவைத் தொகுதி வேட்பாளருமான அண்ணாமலையிடம் கையிருப்பு ரொக்கமாக 5.11 லட்சம் உள்ளது.

வங்கி இருப்பு தொகையாக 25,30,492 உள்ளது. பங்குச் சந்தையில் 60 ஆயிரம் முதலீடு செய்துள்ளார். மேலும் 5 லட்சம் ரூபாய் மதிப்பிலான ஹோண்டா சிட்டி கார் சொந்தமாக உள்ளது. 1.12 கோடி ரூபாய் மதிப்புள்ள 62.73 ஏக்கர் விவசாய நிலம் அண்ணாமலை பெயரில் உள்ளது. அவரது மனைவி அகிலாவிடம் கையிருப்பு ரொக்கமாக 1.56 லட்சம் ரூபாய் உள்ளது. வங்கி இருப்பு தொகையாக 1,14,73,275 உள்ளது.

பங்குச் சந்தையில் 1,65,150 முதலீடு செய்யப்பட்டுள்ளது. சேமிப்புத் திட்ட முதலீடாக 68,130 ரூபாய் உள்ளது. 20,48,000 மதிப்பிலான 320 கிராம் தங்க நகை அண்ணாமலையின் மனைவி அகிலாவிடம் உள்ளது. கோவை செலக்கரிச்சல் கிராமத்தில் 53 லட்சம் ரூபாய் மதிப்பிலான 0.8 ஏக்கர் விவசாய நிலம் அகிலா பெயரில் உள்ளதாக தெரிவிக்கப்பட்டுள்ளது.

அண்ணாமலையின் மகள் ஆராதனா பெயரில் 3,10,450 ரூபாய் செல்வ மகள் சேமிப்புத் திட்டத்தில் முதலீடு செய்யப்பட்டுள்ளது. அண்ணாமலையின் மகள் ஆராதனா பெயரில் 3,10,450 ரூபாய் செல்வ மகள் சேமிப்புத் திட்டத்தில் முதலீடு செய்யப்பட்டுள்ளது. அண்ணாமலைக்கு கடன் எதுவும் இல்லை என தெரிவிக்கப்பட்டுள்ளது.