நடிகர் சூர்யாவின் கங்குவா திரைப்படம் 2D மற்றும் 3D தொழில்நுட்பத்தில், உலகமெங்கும் பத்தாயிரத்திற்கும் மேற்பட்ட திரையரங்குகளில் நாளை திரைக்கு வருகிறது.
ஸ்டுடியோ க்ரீன், ஞானவேல்ராஜா தயாரிப்பில், நடிகர் சூர்யா நடிப்பில், சிறுத்தை சிவா இயக்கத்தில் உருவாகியுள்ள கங்குவா திரைப்படம், நவம்பர் 14ஆம் தேதியான நாளை உலகமெங்கும் திரையரங்குகளில் வெளியாகிறது. இதற்கு தேவி ஸ்ரீ பிரசாத் இசையமைத்துள்ளார்.
சூர்யா திரை பயணத்தில் இதுவரை இல்லாத வகையில் பிரம்மாண்டத்தின் உச்சமாக உருவாகியிருக்கும் இப்படத்தில், திரை ரசிகர்களுக்கு பல ஆச்சரியங்கள் காத்திருப்பதாக படக்குழு ஒவ்வொரு மேடையிலும் தெரிவித்து வருகின்றனர். மேலும் நடிகர் சூர்யாவின் திரைப்படங்களிலேயே இதுவரை இல்லாத அளவில் 280 கோடியில் இப்படம் உருவாக்கப்பட்டுள்ளதாக படக்குழு தரப்பில் தகவல் தெரிவித்துள்ளனர்.
எதற்கும் துணிந்தவன் படத்திற்குப் பிறகு திரையரங்குகளில் சூர்யாவை நேரில் கண்டுகளிக்கும் ரசிகர்களுக்கு மிகப் பெரிய விருந்து காத்திருப்பதாக படக்குழு தரப்பில் நம்பிக்கை அளித்துள்ளனர். இப்படத்தில் இதுவரை வெளியான டீசர், டிரெய்லர்களில் இரண்டு விதமான பாத்திரங்களில் சூர்யா தோற்றம் மிரட்டலாக உள்ளது. முழுக்க ஸ்டைலீஷ் மாடர்ன் சூர்யா, போர் வீரனாகவும் கலக்கும் சூர்யா என இரு கதாப்பாத்திரங்களில் தோன்றும் சூர்யா, திரையில் மேலும் பல விதமான கெட்டப்களில் தோன்றவுள்ளார் எனவும். கதை, பிரம்மாண்டம், விஷுவலாக மட்டுமல்லாது, இது உண்மையில் சூர்யா ரசிகர்களுக்கான கொண்டாட்டமாக இருக்கும் எனவும் கூறப்படுகிறது.
இயக்குநர் சிவா அவரது குழுவுடன் இணைந்து 3 வருட கடின உழைப்பைத் தந்து, கங்குவா படத்தை உருவாக்கியிருக்கிறார். ஒவ்வொரு காட்சியையும் பல வித திட்டமிடல்களுடன், இதுவரை ரசிகர்கள் கண்டிராத புதிய அனுபவம் தரும் வகையில் படத்தை உருவாக்கியுள்ளனர். இப்படத்தில் கடல் கப்பல் ஆக்சன் காட்சிகள், விமான நிலைய சண்டைக்காட்சிகள் டிரெய்லரில் காட்டப்பட்டதை விட திரையில் இன்னும் பிரம்மாண்டமாக இருக்கும். இதைத்தாண்டிய க்ளைமாக்ஸ் காட்சி திரையில் கைத்தட்டல்களை வாங்கும் என்கின்றனர். அதற்கு ஏற்ப ஒவ்வொரு சண்டைக்காட்சிகளும் பெரும் பொருட் செலவில், பிரம்மாண்டமாக உருவாக்கப்பட்டுள்ளது.
பல்வேறு மொழிகளில் இப்படம் வெளியாகும் என படக்குழு தரப்பில் தெரிவிக்கப்பட்டிருந்த நிலையில் இறுதியாக தமிழ்,தெலுங்கு, மலையாளம், கன்னடம்,இந்தி உள்ளிட்ட மொழிகளில் வெளியாகிறது. அனிமல் படத்தின் பிரம்மாண்ட வெற்றிக்குப் பிறகு பாபி தியோல் நடித்திருப்பது பெரும் எதிர்பார்ப்பை ஏற்படுத்தியுள்ளது. திஷா பட்டானிக்கு தென்னிந்தியாவிலும் பெரும் ரசிகர் கூட்டம் உள்ளது. சூர்யாவிற்கு தமிழ் மட்டுமல்லாது தெலுங்கு இந்தியிலும் பெரும் வரவேற்பு உள்ளது. பான் இந்திய நடிகர்கள், கண்கவர் காட்சிகள், இது வரை பார்த்திராத திரைக்களம், புதுவிதமான திரைக்கதை, பிரம்மாண்டம் என தமிழிலிருந்து முதல் பான் இந்திய முயற்சியாக இப்படம் உருவாகியுள்ளது.
படத்தின் இறுதியில் யாருடைய கேமியோ இருக்கிறது என்பது தான், இப்போது பெரும் பேசு பொருளாகியுள்ளது. அது சஸ்பென்ஸ் என்றாலும், அந்த கேமியோ ரசிகர்கள் எதிர்பார்ப்பைவிட பல மடங்கு பிரம்மாண்டமாக இருக்கும் என்று இயக்குநர் சிறுத்தை சிவா கூறியுள்ளார்.
படத்தின் சிஜி, பழைய காலகட்டம், மாடர்ன் உலகம் எல்லாமே மிகத் தத்ரூபமாக உருவாக்கப்பட்டுள்ளது. மிரட்டலான 3டி தொழில்நுட்பம் வடிவமைக்கப்பட்டுள்ளது. கங்குவா முன்னெப்போதும் இல்லாத அளவில், உலகமெங்கும் நாளை 10,500- 11,500 திரையரங்குகளில் இப்படம் வெளியாகிறது. இதுவரையிலான இந்திய சினிமா சாதனைகளை, இப்படம் உடைக்குமென எதிர்பார்க்கப்படுகிறது.