மீண்டும் மோதும் சன் டிவி - இளையராஜா! புகைப்படத் தடையால் வந்த சிக்கல்..! சன் டிவி மேல்முறையீடு!

இளையராஜா தரப்பில், தனது புகைப்படம், பெயரை, வணிகரீதியாக பயன்படுத்தி வருவாய் ஈட்டுகின்றனர். இது தனது தனிப்பட்ட உரிமையை பாதிக்கும் செயல் என்றும், யூ டியூப், பேஸ்புக், இன்ஸ்டாகிராம் போன்ற சமூக வலைதளங்களில் ரீல்ஸ், மீம்ஸ்களில் அனுமதி இன்றி இளையராஜா புகைப்படத்தை பயன்படுத்துவதாகவும், சில நேரங்களில் அவதூறான கருத்துக்களும் பதிவிடப்படுவதாகவும் தெரிவிக்கப்பட்டது.

இதையடுத்து, சமூக வலைதளங்களில் இளையராஜாவின் புகைப்படத்தை அவரது அனுமதி இன்றி பயன்படுத்த தடை விதித்து கடந்த ஆண்டு நவம்பர் 21-ந் தேதி நீதிபதி செந்தில் குமார் உத்தரவிட்டார்.

இந்நிலையில், இளையராஜாவின் படத்தையும், பெயரையும் பயன்படுத்த விதிக்கப்பட்ட தடையை எதிர்த்து சன் டிவி நெட்வர்க் லிமிடெட் சார்பில் சென்னை உயர் நீதிமன்றத்தில் மனு தாக்கல் செய்யப்பட்டுள்ளது.

அதில், "இளையராஜாவின் பாடல்களை ஒளிபரப்புவதற்கு தடை விதிக்கக் கூடாது. நீதிமன்ற தடை உத்தரவால் இளையராஜாவின் படங்களையும், பெயரையும் பயன்படுத்த முடியவில்லை. படத்தையும், பெயரையும் பயன்படுத்துவதால் எப்படி இளையராஜாவின் உரிமை பாதிக்கப்படுகிறது என தெரியவில்லை. அதனால், உத்தரவை மாற்ற வேண்டும்" என கூறப்பட்டுள்ளது. இந்த வழக்கு விரைவில் விசாரணைக்கு வரும் என எதிர்பார்க்கப்படுகிறது.