ரூ.20-க்கு ரிலையன்ஸ் பால் பானம்..! – தமிழ்நாட்டிலிருந்து ஆட்டத்தைத் தொடங்கிய முகேஷ் அம்பானி!

ரிலையன்ஸ் ரீடெய்ல் நிறுவனத்தின் அத்தியாவசிய நுகர்வோர் பொருட்கள் பிரிவான 'ரிலையன்ஸ் கன்சியூமர் புரோடக்ட்ஸ் லிமிடெட்' (RCPL), 'ஜாய்லேண்ட்' (Joyland) என்ற பெயரில் ஸ்ட்ராபெரி மற்றும் வெண்ணிலா சுவைகளில் ரூ.20 விலையில் சுவையூட்டப்பட்ட பாலை (Flavoured Milk) தமிழ்நாட்டில் அறிமுகப்படுத்தியுள்ளது. இதன் மூலம், தயாராகக் குடிக்கும் பால் பானங்கள் (Ready-to-Drink Dairy) சந்தையில் ரிலையன்ஸ் நிறுவனம் முதன்முறையாகக் காலடி எடுத்து வைத்துள்ளது. முதல்கட்டமாகத் தமிழ்நாட்டில் தொடங்கப்பட்டுள்ள இச்சேவை, அடுத்தடுத்து கூடுதல் சுவைகள் மற்றும் பால் பானங்களுடன் இந்தியா முழுவதும் கட்டம்பாட்டாக விரிவாக்கப்படும் என அறிவிக்கப்பட்டுள்ளது.

முன்னதாக 'கேம்பா கோலா' (Campa Cola) பானத்தை அறிமுகப்படுத்திய போது, கோகோ கோலா மற்றும் பெப்சி ஆகிய நிறுவனங்களின் 250 மி.லி பாட்டில் ரூ.20-க்கு விற்கப்பட்ட நிலையில், ரிலையன்ஸ் அதனை ரூ.10-க்கு வழங்கி அதிரடி விலைச் சரிவை ஏற்படுத்தியது. முகேஷ் அம்பானியின் இந்த வழக்கமான 'விலை ஆதிக்கம் மற்றும் பரவலான விநியோக உத்தி' (Price Disruption Playbook) தற்போது 'ஜாய்லேண்ட்' மூலமாகவும் தொடரும் எனப் பொருளாதார வல்லுநர்கள் கணித்துள்ளனர்.

கடந்த 2018-ல் ஐடிசி (ITC) நிறுவனம் தனது 'சன்ஃபீஸ்ட் வண்டர்ஸ் மில்க்' பானத்தை அறிமுகப்படுத்திய போதும் தமிழ்நாடு மற்றும் கர்நாடகாவைத் தான் தேர்ந்தெடுத்தது. ஏனெனில், இந்திய பால் பானங்கள் சந்தையில் இவ்விரு மாநிலங்கள் மட்டுமே கால் பங்கைக் கொண்டுள்ளன. மேலும், கடந்த 2023-ல் 'அமுல்' நிறுவனம் கிருஷ்ணகிரியில் பால் கொள்முதல் செய்ய முயன்ற போது 'ஆவின்' கூட்டுறவு அமைப்பின் வரம்பில் தலையிடுவதாக அரசியல் சர்ச்சை எழுந்த நிலையில், ரிலையன்ஸ் நிறுவனம் சாதாரணப் பால் விற்பனையில் இறங்காமல் 'சுவையூட்டப்பட்ட பால்' பானத்தை மட்டும் விற்பனை செய்வதன் மூலம் அரசியல் சர்ச்சைகளைத் தந்திரமாகத் தவிர்த்துள்ளது.

ஐஎம்ஏஆர்டி (IMARC) அமைப்பின் தரவுப்படி, இந்தியாவின் சுவையூட்டப்பட்ட பால் பானங்கள் சந்தை 2025-ல் ₹7,640 கோடியாக இருந்ததுடன், 2034 வரை ஆண்டுக்கு 19% வளர்ச்சியடையும் என எதிர்பார்க்கப்படுகிறது. இச்சந்தையில் அமுல், மதர் டெய்ரி, கேஎம்எஃப், கவின் கேர் மற்றும் தமிழக அரசின் ஆவின் ஆகிய பெரிய நிறுவனங்கள் ஏற்கனவே முன்னணியில் உள்ளன. இதில் அமுல் நிறுவனம் மட்டுமே 2024-25 நிதியாண்டில் ₹90,000 கோடி விற்றுமுதல் ஈட்டியுள்ளது குறிப்பிடத்தக்கது.

கடந்த 2016-ல் கோகோ கோலா நிறுவனம் தனது 'VIO' சுவையூட்டப்பட்ட பாலை 200 மி.லி பேக்கில் ரூ.25 விலையில் ரிலையன்ஸ் கடைகள் மூலம் முதன்முதலில் அறிமுகப்படுத்தியது. அப்போது கோகோ கோலா தலைவராக இருந்த டி. கிருஷ்ணகுமார், தற்போது ரிலையன்ஸ் கன்சியூமர் நிறுவனத்தின் நிர்வாகப் பொறுப்பை ஏற்று 'ஜாய்லேண்ட்' பிராண்டை முன்னெடுத்து நடத்துகிறார். இவர் VIO-வை விட ரூ.5 குறைவாக ஜாய்லேண்டைச் சந்தையில் இறக்கியுள்ளார்.