இனி ரேஷன் பணத்தை வேறு எதற்கும் பயன்படுத்த முடியாது! மத்திய அமைச்சர் ஜோஷி போட்ட அதிரடி உத்தரவு!

மத்திய அரசின் ஏழைகள் நல உணவுத் திட்டத்தின் (PMGKAY) கீழ் அந்த்யோதயா (AAY) மற்றும் முன்னுரிமை குடும்பங்களுக்கு (PHH) இலவச உணவு தானியங்கள் வழங்கப்பட்டு வருகின்றன. புதுச்சேரியில் இதுவரை இந்தத் திட்டத்திற்கான மானியத் தொகை நேரடிப் பலன் பரிமாற்றம் (DBT) மூலம் பயனாளிகளின் வங்கிக் கணக்கில் பணமாகச் செலுத்தப்பட்டு வந்தது. அந்த்யோதயா அட்டையினருக்கு ரூ. 1,559.9-ம், முன்னுரிமை அட்டையினருக்கு ஒரு நபருக்கு ரூ. 222.85-ம் மாதந்தோறும் வழங்கப்பட்டு வந்தது குறிப்பிடத்தக்கது.

ஆனால், இவ்வாறு வங்கிக் கணக்கில் செலுத்தப்படும் பணம் உணவுப் பொருட்கள் வாங்குவதற்குப் பதிலாக, பிற தேவைகளுக்காகப் பயன்படுத்தப்படுவதாகப் புகார்கள் எழுந்தன. இதனைத் தவிர்க்கும் பொருட்டு, உணவு தானியங்களுக்காக வழங்கப்படும் மானியம் சரியான நோக்கத்திற்காக மட்டுமே பயன்படுத்தப்படுவதை உறுதி செய்ய 'டிஜிட்டல் டோக்கன்' (e-RUPI) முறையை அரசு தற்போது அறிமுகப்படுத்தியுள்ளது. இந்த முன்னோடித் திட்டத்தை மத்திய அமைச்சர் பிரல்ஹாத் ஜோஷி புதுச்சேரியில் தொடங்கி வைத்தார்.

இந்த புதிய முறையில், பயனாளிகளின் சிபிடிசி (CBDC - Central Bank Digital Currency) வாலெட்களில் டிஜிட்டல் டோக்கன்கள் வரவு வைக்கப்படும். சிபிடிசி என்பது இந்திய ரிசர்வ் வங்கியால் (RBI) வெளியிடப்படும் டிஜிட்டல் பணமாகும். இது காகித நோட்டுகளுக்கு இணையான சட்டப்பூர்வ அங்கீகாரம் பெற்றது. சாதாரண UPI பரிவர்த்தனைகளுக்கு வங்கிக் கணக்கு அவசியம், ஆனால் இந்த டிஜிட்டல் வாலட் மூலம் வங்கிக் கணக்கு இல்லாமலேயே பணப் பரிமாற்றம் செய்ய முடியும் என்பது இதன் சிறப்பம்சமாகும்.

பயனாளிகள் தங்களுக்கு வழங்கப்பட்ட இந்த டிஜிட்டல் கூப்பன்களை (QR Code அல்லது SMS மூலம்) அங்கீகரிக்கப்பட்ட நியாய விலைக் கடைகளில் மட்டுமே பயன்படுத்த முடியும். அரிசி அல்லது உணவு தானியங்களை வாங்கும்போது மொபைலில் உள்ள கூப்பனைக் காட்டினால், கடைக்காரர் அதனை ஸ்கேன் செய்வார். உடனே அதற்கான தொகை அரசுத் தரப்பிலிருந்து கடைக்காரரின் கணக்கிற்கு டிஜிட்டல் முறையில் சென்றடையும்.

இந்த இ-ரூபி முறையினால் ரேஷன் மானியம் தவறாகப் பயன்படுத்தப்படுவது தடுக்கப்படுவதோடு, விநியோகத்தில் அதிக வெளிப்படைத்தன்மை ஏற்படும் என எதிர்பார்க்கப்படுகிறது. குறிப்பிட்ட நோக்கத்திற்காக (அரிசி வாங்குவதற்கு மட்டும்) வழங்கப்படும் இந்தத் தொகை, வேறு எதற்கும் பயன்படுத்த முடியாது என்பதால் உண்மையான பயனாளிகளுக்கு உணவுப் பாதுகாப்பு உறுதி செய்யப்படுகிறது.