இலங்கை கடற்படையை கண்டித்து பாம்பன் பாலத்தை முற்றுகையிட்ட மீனவர்கள்

ராமேஸ்வரம் மீனவர்களை கைது செய்துள்ள இலங்கை கடற்படையை கண்டித்து பாம்பன் பாலத்தை முற்றுகையிட்டு மீனவர்கள் போராட்டத்தில் ஈடுபட்டுள்ளனர். 

ராமேஸ்வரத்தை சேர்ந்த ஏராளமான மீனவர்கள் மீன்பிடி அனுமதி சீட்டுடன் பருத்தித்துறை அருகே மீன்பிடித்துக்கொண்டிருந்தனர். அப்போது அங்கு வந்த இலங்கை கட்டற்படையினர் தமிழக மீனவர்களை சுற்றி வளைத்தனர். மேலும் எல்லை தாண்டி மீன்பிடிக்க வந்ததாக கூறி அவர்களை கைது செய்தனர். தமிழக மீனவர்கள் 12 பேரை கைது செய்து அவர்களின் விசைப்படகுகளையும் பறிமுதல் செய்தனர். ஏற்கனவே நேற்று முன் தினம் நெடுந்தீவு அருகே மீன்பிடித்துக்கொண்டிருந்த ராமேஸ்வரம் மீனவர்கள் 23 பேர் இலங்கை கடற்படையால் கைது செய்யப்பட்டனர்.   தொடர்ச்சியாக இலங்கை கடற்படை கைது நடவடிக்கைகளில் ஈடுபட்டு வருவது தமிழக மீன்வர்களை அதிர்ச்சி அடைய செய்துள்ளது.

இந்த நிலையில், ராமேஸ்வரம் மீனவர்களை கைது செய்துள்ள இலங்கை கடற்படையை கண்டித்து பாம்பன் பாலத்தை முற்றுகையிட்டு மீனவர்கள் சாலை மறியல் போராட்டத்தில் ஈடுபட்டுள்ளனர்.  இலங்கை கடற்படை கைது செய்த ராமேஸ்வரம் மீனவர்களை விடுவிக்க வலியுறுத்தி சாலை மறியல் போராட்டத்தில்  ஈடுபட்டுள்ளனர். இதனால் அங்கு பதற்றமான சூழ்நிலை நிலவுகிறது.