மேற்கு வங்காளத்தில் முதல்வர் மம்தா பானர்ஜி தலைமையிலான திரிணாமுல் காங்கிரஸ் அரசுக்கும், கவர்னருக்கும் இடையே மாநிலப் பல்கலைக்கழகங்களின் நிர்வாகம் தொடர்பாக மோதல் நீடித்து வந்தது. இதன் விளைவாக, மாநில அரசுப் பல்கலைக்கழகங்களின் வேந்தர் பொறுப்பில் கவர்னருக்குப் பதிலாக முதல்வரை நியமிக்க வகை செய்யும் மூன்று சட்டத் திருத்த மசோதாக்களை (மேற்கு வங்காள பல்கலைக்கழகங்கள் சட்ட திருத்த மசோதா-2022, அலியா பல்கலைக்கழக திருத்த மசோதா-2022, மேற்கு வங்காள சுகாதார அறிவியல் பல்கலைக்கழக திருத்த மசோதா-2022) கடந்த 2022-ஆம் ஆண்டு சட்டசபையில் நிறைவேற்றியது. அப்போதைய கவர்னர் ஜெகதீப் தன்கர் (தற்போது துணை ஜனாதிபதி) உடன் ஏற்பட்ட நிர்வாகப் பிணக்குகளே இந்த முடிவுக்கு முக்கிய காரணமாகும்.
இந்த மசோதாக்கள், புதிய கவர்னர் சி.வி. ஆனந்தபோஸ் அவர்களால், கடந்த ஆண்டு ஏப்ரல் மாதம் ஜனாதிபதி திரவுபதி முர்முவின் பரிசீலனைக்காக அனுப்பி வைக்கப்பட்டன. மசோதாக்கள் குறித்து மத்திய அரசு மட்டத்தில் விரிவான ஆலோசனைகள் மேற்கொள்ளப்பட்டன. இந்தச் சூழலில், சமீபத்தில் ஜனாதிபதி திரவுபதி முர்மு, இந்த மூன்று மசோதாக்களுக்கும் அனுமதி மறுத்து நிராகரித்துள்ளார் என்று மேற்கு வங்காள மாநில கவர்னர் மாளிகை அதிகாரி ஒருவர் அதிகாரப்பூர்வமாகத் தெரிவித்துள்ளார்.
ஜனாதிபதி முர்முவின் இந்த முடிவைத் தொடர்ந்து, மேற்கு வங்காள மாநிலப் பல்கலைக்கழகங்களில் ஏற்கனவே அமலில் உள்ள சட்டங்களே தொடர்ந்து நீடிக்கும். அதாவது, மாநில கவர்னரே தொடர்ந்து பல்கலைக்கழகங்களின் வேந்தராகப் பொறுப்பு வகிப்பார் என்பது உறுதி செய்யப்பட்டுள்ளது. கவர்னர் மாளிகையின் இந்த அறிவிப்பு, திரிணாமுல் காங்கிரஸ் அரசின் நிர்வாக சீர்திருத்த முயற்சிக்கு சட்டரீதியான பின்னடைவை ஏற்படுத்தியுள்ளது.