சொர்க்கவாசல் படத்தில் கட்டபொம்மன் பெயருக்கு இழுக்கு- ஆர்.ஜே.பாலாஜிக்கு எதிராக மனு

சொர்க்கவாசல் படத்தை OTT, amazon போன்ற பொது ஊடகங்களில் வெளியிட தடை விதிப்பதோடு, சொர்க்கவாசல் படத்தின் வெளியீட்டாளர்,  இயக்குனர் ஆகியோர் மீது உரிய நடவடிக்கை எடுக்க உத்தரவிட கோரி உயர்நீதிமன்ற மதுரைக்கிளையில் மனு தாக்கல் செய்யப்பட்டுள்ளது.

மதுரை மாவட்டத்தைச் சேர்ந்த பரத் உயர்நீதிமன்ற மதுரை அமர்வில் பொதுநல வழக்கினைத் தாக்கல் செய்திருந்தார். அதில், " கடந்த நவம்பர் மாதம் ஆர்.ஜே.பாலாஜி சொர்க்கவாசல் திரைப்படம் வெளியானது. இதில் முக்கிய கதாபாத்திரத்திற்கு கட்டபொம்மன் என பெயர் சூட்டப்பட்டு நடிகர் கருணாஸ் அந்த கதாபாத்திரத்தில் நடித்திருந்தார். மது, போதை பொருட்கள் போன்றவற்றை அந்த கதாப்பாத்திரம் விற்பனை செய்யும் வகையில் காட்சிகள் இடம் பெற்றுள்ளன. கல்வி நிறுவனங்கள், பேருந்து நிலையங்களுக்கு விடுதலைப் போராட்ட வீரர் கட்டபொம்மனின் பெயர் சூட்டப்பட்டுள்ள நிலையில், சொர்க்கவாசல் படத்தில் அவரது பெயர் தவறான செயல்களை செய்யும் கதாபாத்திரத்திற்கு சூட்டப்பட்டுள்ளது. 

இது தொடர்பாக நடவடிக்கை கோரி அதிகாரிகளிடம் மனு அளித்தும் எவ்வித நடவடிக்கையும் இல்லை. ஆகவே சொர்க்கவாசல் படத்தை OTT, amazon போன்ற பொது ஊடகங்களில் வெளியிட தடை விதிப்பதோடு, சொர்க்கவாசல் படத்தின் வெளியீட்டாளர்,  இயக்குனர் ஆகியோர் மீது உரிய நடவடிக்கை எடுக்க உத்தரவிட வேண்டும்" என கூறியிருந்தார். இந்த வழக்கை விசாரித்த நீதிபதிகள் எம்.எஸ்.ரமேஷ், மரிய கிளாட் அமர்வு, மனுதாரரின் மனுவை திரைப்பட சான்றிதழ் வாரியத்தின் மண்டல அலுவலர், தமிழக திரைப்பட துறையின் முதன்மைச் செயலர் பரிசீலித்து உரிய நடவடிக்கை எடுக்க உத்தரவிட்டு வழக்கை முடித்து வைத்தனர்.