மாஸ்டர் மகேந்திரனை விடாமல் விளாசும் நெட்டிசன்ஸ்.. அடுத்த சர்ச்சையா..?

 By ttn desk Jun 27, 2026, 05:35 IST1782518726000
1

தவெக கட்சியின் தலைவரும், தமிழக முதலமைச்சருமான விஜய்க்கு ஆதரவாகப் பேசி வரும் நடிகர் மாஸ்டர் மகேந்திரனின் கருத்துகள், சமூக வலைதளங்களில் மீண்டும் விவாத பொருளாக மாறியுள்ளன.

கடந்த வாரம் முதலமைச்சர் விஜய்க்கு ஆதரவாக பேசிய கருத்துகள் பெரும் சர்ச்சையை ஏற்படுத்திய நிலையில், தனது பேச்சு தவறாக புரிந்துகொள்ளப்பட்டதாக விளக்கி அவர் வீடியோ ஒன்றை வெளியிட்டிருந்தார். இந்த நிலையில், ஹைதராபாத்தில் தனது புதிய திரைப்படத்தின் புரமோஷன் பணிகளில் ஈடுபட்டிருந்த மாஸ்டர் மகேந்திரனிடம், செய்தியாளர்கள் மீண்டும் இதுகுறித்துக் கேள்வி எழுப்பினர்.

அதற்கு பதிலளித்த மாஸ்டர் மகேந்திரன் கூறியதாவது:

"கடந்த 75 ஆண்டுகளாக தமிழ்நாட்டில் திமுகவும், அதிமுகவும் மாறி மாறி ஆட்சி செய்து கொண்டிருக்கின்றன. அந்த நீண்ட காலத்தில் அவர்களால் செய்ய முடியாத விஷயங்களை, வெறும் 35 நாட்களாக மட்டுமே முதலமைச்சராகப் பொறுப்பேற்றுள்ள விஜயிடம் உடனே செய்ய வேண்டும் என்று எதிர்பார்ப்பது நியாயமல்ல. திருமணம் நடந்த மறுநாளே குழந்தை பிறக்க வேண்டும் என்று எதிர்பார்க்க முடியுமா? அதுபோல புதிய அரசுக்கும் செயல்படக் கால அவகாசம் தேவை."

வரலாற்றுப் பிழையைச் சுட்டிக்காட்டும் நெட்டிசன்கள்:

மாஸ்டர் மகேந்திரனின் இந்த நேர்காணல் வெளியானதைத் தொடர்ந்து, சமூக வலைதளங்களில் திமுக மற்றும் அதிமுக ஆதரவாளர்கள் அவரது வரலாற்றுப் புரிதலை கடுமையாக விமர்சித்து வருகின்றனர்.

இந்தியா 1947-இல் சுதந்திரம் பெற்றதில் இருந்தே 80 ஆண்டுகளுக்குப் பக்கமாகத்தான் ஆகிறது. அப்படி இருக்கையில், திமுக மற்றும் அதிமுக மட்டுமே 75 ஆண்டுகள் ஆட்சி செய்ததாகக் கூறுவது வரலாற்றுப் பிழை என அவர்கள் சுட்டிக்காட்டுகின்றனர். மேலும், பேரறிஞர் அண்ணா தலைமையில் திமுக முதன்முதலில் 1967-ஆம் ஆண்டில்தான் தமிழகத்தில் ஆட்சி பொறுப்பிற்கு வந்தது என்பதையும், அதற்கு முன்பு காங்கிரஸ் கட்சிதான் ஆட்சியில் இருந்தது என்பதையும் நெட்டிசன்கள் சுட்டிக்காட்டி விவாதித்து வருகின்றனர்.

இருப்பினும், அவரது ஆதரவாளர்கள் மற்றும் சில நடுநிலையாளர்கள், "அவர் குறிப்பிட்ட ஆண்டுகள் தவறாக இருக்கலாம், ஆனால் ஒரு புதிய அரசு பொறுப்பேற்று 35 நாட்களே ஆகும் நிலையில், அவர்களின் செயல்பாடுகளை மதிப்பிடக் கால அவகாசம் தேவை என்று அவர் கூறியுள்ள கருத்து நியாயமானதுதான்" என அவருக்கு ஆதரவாகப் பதிவிட்டு வருகின்றனர்.

தொடர் விமர்சனங்கள் எழுந்து வரும் நிலையிலும், இந்த விவகாரம் தொடர்பாக நடிகர் மாஸ்டர் மகேந்திரன் தரப்பிலிருந்து இதுவரை புதிய விளக்கங்கள் எதுவும் அளிக்கப்படவில்லை.


 


 

From around the web