திருமண மண்டபத்தில் அலறிய தாய்! வானத்தை நோக்கி சுட்ட குண்டு... 5 வயது சிறுவனின் வயிற்றில் பாய்ந்தது!

உத்தரப் பிரதேச மாநிலம் சுல்தான்பூர் மாவட்டம் காடிபூர் பகுதியில், திருமண ஊர்வலம் தொடங்குவதற்கு முன்பாக நடத்தப்பட்ட கொண்டாட்டத் துப்பாக்கிச் சூட்டில் (Celebratory Firing), துரதிர்ஷ்டவசமாக குண்டு பாய்ந்து 5 வயது சிறுவன் பரிதாபமாக உயிரிழந்த சம்பவம் பெரும் பரபரப்பையும் சோகத்தையும் ஏற்படுத்தியுள்ளது.

காடிபூர் காவல் எல்லைக்குட்பட்ட ஃபுதேஹரி பாங்கே கிராமத்தைச் சேர்ந்த கிரிவர் கோபால் படேலின் 5 வயது மகன் ஆர்ஷ் படேல். இவரது உறவினரான அனுராக் படேல் என்பவரின் திருமணம் ஞாயிற்றுக்கிழமை மாலை நடைபெறவிருந்தது. இதற்காக, சுராபூரில் உள்ள சுந்தர் திருமண மண்டபத்திலிருந்து மாலை 6.30 மணியளவில் 'பாரத்' எனப்படும் மணமகனின் ஊர்வலம் புறப்படத் தயாராக இருந்தது.

அப்போது, மணமகனின் மைத்துனரான அஜய் என்பவர் ஆர்வ மிகுதியால் துப்பாக்கியால் வானத்தை நோக்கிச் சுட்டுள்ளார். இதில் எதிர்பாராதவிதமாக, சற்றுத் தொலைவில் நின்று கொண்டிருந்த சிறுவன் ஆர்ஷ் படேலின் வயிற்றில் துப்பாக்கிக் குண்டு பாய்ந்தது. குண்டு பாய்ந்த அதிர்ச்சியில் சிறுவன் ரத்த வெள்ளத்தில் சரிந்து விழவே, திருமண மண்டபத்தில் பெருங் கூச்சலும் பதற்றமும் நிலவியது.

துப்பாக்கிச் சூட்டைக் கண்டு அதிர்ச்சியடைந்த தாய் அம்ரிதா படேல் மற்றும் குடும்பத்தினர், சிறுவனை உடனடியாக காடிபூர் சமூக சுகாதார மையத்திற்கு விரைந்து கொண்டு சென்றனர். அங்குச் சிறுவனின் நிலைமை மிகவும் கவலைக்கிடமாக இருந்ததால், மேல் சிகிச்சைக்காக சுல்தான்பூரில் உள்ள அரசு மருத்துவக் கல்லூரி மருத்துவமனைக்கு மருத்துவர்கள் பரிந்துரைத்தனர்.

எனினும், மருத்துவமனைக்குக் கொண்டு செல்லப்பட்ட சிறுவனைப் பரிசோதித்த மருத்துவர்கள், அவன் ஏற்கனவே இறந்துவிட்டதாக அறிவித்தனர்.

இச்சம்பவம் குறித்துத் தகவல் அறிந்த காடிபூர் காவல் கோட்ட அதிகாரி (CO) வினய் கௌதம் தலைமையில் காவல்துறையினர் சம்பவ இடத்திற்கு வந்து விசாரணை மேற்கொண்டனர். சிறுவனின் உடல் பிரேதப் பரிசோதனைக்காக அனுப்பப்பட்டுள்ளது.

துப்பாக்கிச் சூடு நடத்திய அஜய் என்பவர் சம்பவ இடத்திலிருந்து தப்பிச் சென்று தனது கைபேசியையும் அணைத்து வைத்துள்ளார். தலைமறைவாக உள்ள அஜய்யைப் பிடிக்கத் தனிப்படைகள் அமைக்கப்பட்டுத் தீவிரத் தேடுதல் வேட்டை நடைபெற்று வருகிறது.