#BREAKING தமிழ்நாட்டின் புதிய டிஜிபியாக மகேஷ் குமார் அகர்வால் நியமனம்
தமிழகத்தின் புதிய சட்டம், ஒழுங்கு டிஜிபியாக மகேஷ் குமார் அகர்வால் நியமனம். புதிய டிஜிபியை நியமித்து தமிழக அரசு உத்தரவு பிறப்பித்துள்ளது.
யார் இந்த மகேஷ்குமார் அகர்வால்?
தமிழக காவல்துறையின் புதிய சட்டம் ஒழுங்கு டிஜிபி மற்றும் போலீஸ் படைத் தலைவராக (DGP & Head of Police Force) மகேஷ்குமார் அகர்வால் நியமிக்கப்பட்டுள்ளார். பஞ்சாப் மாநிலத்தைச் சேர்ந்த இவர், தனது தந்தையின் வழிகாட்டுதலில் சட்டம் படித்துவிட்டு, 1994ம் ஆண்டு தனது 22-வது வயதில் சிவில் சர்வீஸ் தேர்வில் வெற்றி பெற்று ஐபிஎஸ் அதிகாரியாகத் தன் காவல் பணியைத் தொடங்கினார். தமிழகத்தின் பல்வேறு மாவட்டங்களிலும் முக்கியப் பிரிவுகளிலும் திறம்படப் பணியாற்றிய அனுபவம் இவருக்கு உண்டு. குறிப்பாக, தேனி மற்றும் தூத்துக்குடி மாவட்ட எஸ்பி, சென்னை பூக்கடை துணை கமிஷனர், போக்குவரத்து பிரிவு துணை கமிஷனர், மதுரை கமிஷனர், சென்னை தெற்கு மண்டல கூடுதல் கமிஷனர், சென்னை போலீஸ் கமிஷனர், டிஜிபி அலுவலகச் செயலாக்கப் பிரிவு ஏடிஜிபி மற்றும் தமிழக ஆயுதப்படை டிஜிபி எனப் பல பொறுப்புகளை வகித்துள்ளார். மேலும், சிபிஐ அதிகாரியாக 10 ஆண்டுகள் பணியாற்றியதுடன், போதைப்பொருள் தடுப்பு நுண்ணறிவுப் பிரிவு ஏடிஜிபியாகவும், டெல்லியில் எல்லை பாதுகாப்புப் படையின் (BSF) கூடுதல் இயக்குநராகவும் மிக உயரிய பொறுப்புகளைத் திறம்படக் கையாண்டுள்ளார்.
மகேஷ்குமார் அகர்வால் பல முக்கிய வழக்குகளில் தனது கூர்மையான புலனாய்வுத் திறனை வெளிப்படுத்தியவர் ஆவார். சேலத்தில் இருந்து சென்னை வந்த ரயிலில் ரூ.5.78 கோடி கொள்ளையடிக்கப்பட்ட பெரும் பரபரப்பான வழக்கில், இவர் தலைமையிலான சிபிசிஐடி பிரிவுதான் தீவிர விசாரணை நடத்தி கொள்ளையர்களைக் கைது செய்தது. இது தவிர, சென்னை சென்ட்ரல் ரயில் நிலைய குண்டுவெடிப்பு வழக்கு மற்றும் சென்னை பெண் ஐடி ஊழியர் உமா மகேஸ்வரி கொலை வழக்கு போன்ற சவாலான வழக்குகளிலும் நேர்த்தியான விசாரணையை மேற்கொண்டு குற்றவாளிகளைக் கண்டறிவதில் முக்கியப் பங்காற்றினார். கொரோனா ஊரடங்கு காலத்தில் சென்னை மாநகர காவல் ஆணையராக இருந்தபோது, பொதுமக்களின் பாதுகாப்பு, தொழிலாளர்களின் நலன் மற்றும் நகரக் கண்காணிப்பில் இவர் எடுத்த அதிரடி மற்றும் கனிவான நடவடிக்கைகள் பரவலான பாராட்டுகளைப் பெற்றன. தற்போது, பதவியில் இருந்த சந்தீப் ராய் ரத்தோருக்குப் பதிலாக, தமிழக காவல்துறையின் உச்சபட்ச பதவியான சட்டம் ஒழுங்கு டிஜிபியாக மகேஷ்குமார் அகர்வால் நியமிக்கப்பட்டிருப்பது, அவரது நேர்மையான மற்றும் திறமையான நிர்வாகத்திற்குச் சான்றாக அமைந்துள்ளது.