மதுரை தனிஷ்க் கொள்ளை - போலீசாருக்கு கிடைத்த முக்கியத் துப்பு..! கொள்ளையன் பயன்படுத்திய ஆட்டோ சிக்கியது?

 By ttn desk Nov 14, 2026, 14:13 IST1794645839442
1

மதுரையில் உள்ள பிரபல நகைக்கடையான தனிஷ்க் ஜூவல்லரியில் 15 கிலோ தங்க நகைகள் கொள்ளையடிக்கப்பட்ட வழக்கில், காவல்துறையினரின் விசாரணையில் முக்கிய திருப்பம் ஏற்பட்டுள்ளது. இந்தச் சம்பவம் தொடர்பாக மதுரை பழங்காநத்தத்தை சேர்ந்த பட்டதாரி இளைஞர் ஒருவரின் வீட்டில் போலீசார் நேற்று முதல் தீவிர சோதனை நடத்தி வருகின்றனர். இந்த சோதனையின்போது அவரது வீட்டில் இருந்து துப்பாக்கி ஒன்று பறிமுதல் செய்யப்பட்டுள்ளதாகத் தகவல்கள் வெளியாகிப் பரபரப்பை ஏற்படுத்தியுள்ளன.

கொள்ளைச் சம்பவத்திற்குப் பிறகு, சம்பந்தப்பட்ட பட்டதாரி இளைஞர் ஆட்டோ ஒன்றில் மாடக்குளம் வயல்வெளிப் பகுதிக்குச் சென்றதற்கான சிசிடிவி (CCTV) காட்சிகள் தற்போது வெளியாகியுள்ளன. கொள்ளையின் போது அணிந்திருந்த ஆடைகள் உள்ளிட்ட தடயங்களை அழிப்பதற்காக, அவற்றை எரிக்கும் நோக்கில் அவர் அந்த வயல்வெளிப் பகுதிக்குச் சென்றிருப்பது விசாரணையில் தெரியவந்துள்ளது.

இதனையடுத்து, அந்த இளைஞர் சென்று வந்த மாடக்குளம் வயல்வெளிப் பகுதியில் காவல்துறையினர் தற்போது தீவிர தேடுதல் வேட்டையில் ஈடுபட்டு வருகின்றனர். தடயங்களை அழிப்பதற்காக மட்டுமின்றி, கொள்ளையடிக்கப்பட்ட 15 கிலோ தங்க நகைகளை அந்த வயல்வெளிப் பகுதியில் ஏதேனும் பதுக்கி வைத்துள்ளாரா என்ற சந்தேகத்தின் அடிப்படையிலும் போலீசார் அங்கு சல்லடை போட்டுத் தேடி வருகின்றனர்.

மேலும், தடயங்களான ஆடைகளை எரிப்பதற்குப் பயன்படுத்தப்பட்ட ஆட்டோ, பழங்காநத்தத்தில் உள்ள அந்தப் பட்டதாரி இளைஞரின் வீட்டிற்கு அருகிலேயே போலீசாரிடம் சிக்கியுள்ளது. பறிமுதல் செய்யப்பட்ட துப்பாக்கி மற்றும் சிக்கியுள்ள ஆட்டோ ஆகியவற்றின் அடிப்படையில் காவல்துறையினர் அடுத்தகட்ட விசாரணையைத் தீவிரப்படுத்தியுள்ளனர்.


 


 

From around the web