திமுக மூத்த தலைவர் கே.என்.நேருவுக்கு சென்னை உயர் நீதிமன்றம் நோட்டீஸ்!

திமுக மூத்த தலைவரும் முன்னாள் அமைச்சருமான கே.என். நேருவுக்கு விளக்கம் கேட்டுச் சென்னை உயர் நீதிமன்றம் நோட்டீஸ் அனுப்பி உத்தரவிட்டுள்ளது.

வருமான வரித்துறை தாக்கல் செய்த மேல்முறையீட்டு மனுவை விசாரணைக்கு ஏற்றுக்கொண்ட தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி. அருள் முருகன் அடங்கிய அமர்வு, முதற்கட்ட வாதங்களைக் கேட்டறிந்த பிறகு இந்த அதிரடி உத்தரவைப் பிறப்பித்துள்ளது. கே.என். நேரு ரூ.17 கோடி கணக்கில் வராத வருமானம் ஈட்டியதாகவும், ரூ.11.98 கோடி வரை முறையான கணக்கு காண்பிக்கப்படாத முதலீடுகளைச் செய்துள்ளதாகவும் வருமான வரித்துறைத் தரப்பில் நீதிமன்றத்தில் சுட்டிக்காட்டப்பட்டது.

முன்னதாக, வருமான வரித் தீர்ப்பாயத்தின் உத்தரவை எதிர்த்து வருமான வரித்துறை உயர் நீதிமன்றத்தில் இந்த மேல்முறையீட்டைத் தாக்கல் செய்தது. வழக்கை விசாரித்த நீதிபதிகள், வருமான வரித்துறை முன்வைத்துள்ள குற்றச்சாட்டுகள் மற்றும் ஆதாரங்களில் போதிய முகாந்திரம் இருப்பதாகத் தெரிவித்து, இதுகுறித்து கே.என். நேரு பதிலளிக்க உத்தரவிட்டு நோட்டீஸ் அனுப்பினர்.

திமுக மூத்த நிர்வாகி மற்றும் முக்கிய தலைவரான கே.என். நேருவுக்கு எதிராகச் சென்னை உயர் நீதிமன்றம் நோட்டீஸ் அனுப்பி மேல்முறையீட்டு மனுவை விசாரணைக்கு எடுத்துக்கொண்ட சம்பவம், தமிழக அரசியலிலும் திமுக வட்டாரத்திலும் பெரும் பரபரப்பையும் அதிர்வலைகளையும் ஏற்படுத்தியுள்ளது.