இன்றைய நவீனம் மற்றும் கோடிகளில் புரளும் டிஜிட்டல் திரையிசை உலகைக் காட்டிலும், 70 மற்றும் 80-களின் இசை உலகம் முழுக்க முழுக்க அர்ப்பணிப்பாலும் திறமையாலும் மட்டுமே கட்டமைக்கப்பட்டிருந்தது. அதற்குச் மிகச்சிறந்த உதாரணம் தான், 1978-ஆம் ஆண்டு வெளியான 'அச்சாணி' திரைப்படத்தில் இடம்பெற்ற "மாதா உன் கோவிலில் மணி தீபம் ஏற்றினேன்" என்ற காலத்தால் அழியாத காவியப் பாடல். இப்பாடல் உருவானதற்குப் பின்னால் இருக்கும் நெகிழ்ச்சியான பின்னணித் தகவல்கள் தற்போது இணையத்தில் கவனம் பெற்று வருகின்றன.
நெருக்கடிக்கு மத்தியில் உருவான பதிவு:
'அச்சாணி' திரைப்படத்திற்கு இசையமைக்க இசைஞானி இளையராஜா வாங்கிய மொத்த சம்பளம் வெறும் 8,000 ரூபாய் மட்டுமே. இத்திரைப்படத்தின் பாடல்களை 'ஸ்டீரியோ ரெக்கார்டிங்' (Stereo Recording) முறையில் பதிவு செய்யத் திட்டமிட்டு, முதலில் அருணாச்சலா ஸ்டூடியோ ஒப்பந்தம் செய்யப்பட்டது. ஆனால், அங்கு தொழில்நுட்பக் கோளாறு காரணமாக ஸ்டீரியோ முறையில் பதிவு செய்ய முடியாமல் போனது.
இதனைத் தொடர்ந்து, மாற்று ஏற்பாடாகப் பிரசாத் ஸ்டூடியோவில் ஒரே ஒரு மணிநேரம் மட்டுமே இளையராஜாவுக்கு அவகாசம் ஒதுக்கப்பட்டது. அந்த மிகக் குறுகிய ஒரு மணிநேரத்திற்குள் இரண்டு பாடல்களைப் பதிவு செய்ய வேண்டிய கட்டாயத்திற்கும், கடும் நெருக்கடிக்கும் இளையராஜா தள்ளப்பட்டார்.
மிரட்டிய நேரம்... தடுமாறிய ஜானகி:
திட்டமிட்டபடி முதல் பாடலான "தாலாட்டு பிள்ளையுண்டு தாலாட்டு" என்ற பாடலை எஸ்பி பாலசுப்ரமணியம் மற்றும் பி. சுசீலா ஆகியோரின் குரல்களில் மிகவேகமாகப் பதிவு செய்து அனுப்பிவிட்டார் இளையராஜா. அடுத்ததாக, எஸ். ஜானகியின் குரலில் "மாதா உன் கோவிலில்" பாடலைப் பதிவு செய்யத் தொடங்கினர். அப்போது நேரம் மிகக் குறைவாக இருந்ததால், அடுத்தடுத்து ஏற்பட்ட சில இடையூறுகளால் இளையராஜா இசைக்குழுவினர் மீது கோபமடைந்தார்.
ஆனால், அந்தச் சமயத்தில் பாடகி எஸ். ஜானகி மைக் முன்னால் நின்று அழுது கொண்டிருப்பதை இசைக்குழுவினர் இளையராஜாவிடம் கூறினர். பதறிப்போன இளையராஜா, அவரிடம் சென்று விபரம் கேட்டார். பாடலின் வரிகளும் மெட்டும் தந்த உணர்ச்சிப் பெருக்கால், பாடிக்கொண்டிருக்கும் போதே தமக்கு அழுகை வந்துவிட்டதாகவும், அதை அடக்க முடியாமல் தவிப்பதாகவும் கூறி, ஜானகி சிறிது அவகாசம் கேட்டுள்ளார்.
காலத்தைக் வென்ற காவியம்:
பின்னணிப் பாடகி எஸ். ஜானகியையே நிலைகுலையச் செய்த அந்தப் பாடலின் ஜீவனைப் புரிந்துகொண்ட இளையராஜா, அவரை ஆசுவாசப்படுத்தி, மீண்டும் பாட வைத்தார். அப்படி அந்த ஒற்றை மணிநேர நெருக்கடிக்குள், உருகி உருகிப் பாடிப் பதிவு செய்யப்பட்ட பாடல் தான் இன்று வரை கேட்போரின் மனங்களைக் கலங்க வைக்கும் "மாதா உன் கோவிலில் மணி தீபம் ஏற்றினேன்" திருப்பாடல்.
பாடல் வெளியாகிப் பல தசாப்தங்களைக் கடந்தும், இன்றும் இப்பாடலைப் பற்றி நாம் பேசுகிறோம் என்றால், அதற்கு அன்றைய திரைக்கலைஞர்கள் ஒருவர் மீது ஒருவர் வைத்திருந்த நம்பிக்கையும், தொழிலின் மீது அவர்கள் கொண்டிருந்த அற்பணிப்புமே முக்கியக் காரணம்.