அடங்காத பேராசை: மாமியார் வீட்டு மாடியில் இருந்து தள்ளிவிடப்பட்டு இளம் பெண் கொடூர கொலை?

திருமணமாகி 17 மாதங்கள் கூட நிறைவடையாத நிலையில், 25 வயதான தீபிகா என்ற இளம் பெண், தனது மாமியார் வீட்டின் கூரையிலிருந்து கீழே விழுந்து பரிதாபமாக உயிரிழந்துள்ளார். இது தற்செயலாக நடந்த விபத்தோ அல்லது தற்கொலையோ அல்ல, மாறாக திட்டமிட்டு நடத்தப்பட்ட கொடூர கொலை என்று பெண்ணின் குடும்பத்தினர் குற்றம் சாட்டுகின்றனர். இந்தச் சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.

திருமணம் முடிந்த மூன்று முதல் நான்கு மாதங்களிலேயே தீபிகாவிற்குப் பல்வேறு தொல்லைகள் ஆரம்பமாகியுள்ளன. கூடுதல் வரதட்சணை கேட்டு அவர் மாமியார் வீட்டில் மனரீதியாகவும் உடல்ரீதியாகவும் கடுமையாகத் துன்புறுத்தப்பட்டு வந்துள்ளார். குடும்ப அமைதி கெட்டுவிடக் கூடாது என்பதற்காக, "பிரச்சனைகள் அப்படியே கடந்து போகட்டும்" என்று நினைத்து, ஆரம்பத்தில் காவல் நிலையத்தில் புகார் அளிக்கவில்லை எனத் தீபிகாவின் தந்தை சஞ்சய் நகர் வேதனையுடன் தெரிவித்துள்ளார்.

கடந்த 2024 டிசம்பரில் நடைபெற்ற இந்தத் திருமணத்திற்காகத் தீபிகாவின் தந்தை சுமார் 1 கோடி ரூபாய் வரை செலவு செய்துள்ளார். திருமணத்தின் போது 11 லட்சம் ரூபாய் ரொக்கம், 50 லட்சம் ரூபாய் மதிப்புள்ள தங்க நகைகள் மற்றும் ஒரு சொகுசு ஸ்கார்பியோ கார் ஆகியவற்றை வரதட்சணையாகக் கொடுத்துள்ளார். இவ்வளவு கொடுத்த பின்பும், அந்த வரதட்சணையால் திருப்தியடையாத மாமியார் வீட்டினர், தீபிகாவைத் தொடர்ந்து சித்திரவதை செய்து வந்துள்ளனர்.

உயிரிழப்பதற்கு முந்தைய நாள் ஞாயிற்றுக்கிழமை அன்று, தீபிகா அழுதுகொண்டே தனது பெற்றோரைத் தொலைபேசியில் அழைத்துள்ளார். தனது கணவர் மற்றும் மாமியார் வீட்டினர் தன்னைத் கொடூரமாகத் தாக்கித் துன்புறுத்துவதாகக் கூறி கதறியுள்ளார். மகளின் நிலையைத் தாங்க முடியாத தந்தை, சில உறவினர்களுடன் அன்றைய தினமே மாலை மாமியார் வீட்டிற்கு நேரில் சென்று, அவர்களுக்குள் ஏற்பட்ட தகராறைத் தீர்க்கக் கடுமையாக முயற்சி செய்துள்ளார்.

பெற்றோர்கள் மாமியார் வீட்டில் பேசி முடித்துவிட்டுத் தங்கள் வீட்டிற்குப் புறப்பட்ட சில மணி நேரங்களிலேயே, அதாவது நள்ளிரவு 12:30 மணியளவில் அவர்களுக்கு ஒரு அதிர்ச்சி அழைப்பு வந்துள்ளது. தீபிகா மாடியில் இருந்து கீழே விழுந்துவிட்டதாகக் கூறப்பட்ட அந்தத் தகவலைக் கேட்டு அலறியடித்துக்கொண்டு ஓடிய குடும்பத்தினருக்கு, அவர் பலத்த காயங்களுடன் சடலமாகக் கிடந்த காட்சியே எஞ்சியிருந்தது.

தீபிகாவின் மரணத்தைத் தற்கொலை என்ற கோணத்தில் பார்க்கக் கூடாது என்றும், அது முற்றிலும் ஒரு கொடூரக் கொலை என்றும் அவரது தந்தை சஞ்சய் நகர் உறுதியாகக் கூறுகிறார். "அவர்கள் அவளை அடித்துக் கொன்றுவிட்டு, பின்னர் கூரையிலிருந்து கீழே தள்ளிவிட்டுள்ளனர். அவளது வயிற்றில் கத்தியாலோ அல்லது ஸ்க்ரூடிரைவராலோ குத்தப்பட்ட தழும்புகள் உள்ளன. மருத்துவமனையில் பார்த்தபோது அவளது காது மற்றும் மூக்கிலிருந்து இரத்தம் வழிந்தது" என அவர் கண்ணீர்மல்கக் குற்றஞ்சாட்டியுள்ளார்.

இச்சம்பவம் குறித்து நள்ளிரவில் தகவல் அறிந்த காவல்துறையினர் உடனடியாக சம்பவ இடத்திற்கு விரைந்து உடலைக் கைப்பற்றினர். பாதிக்கப்பட்ட பெண்ணின் குடும்பத்தினர் அளித்த புகாரின் அடிப்படையில், தீபிகாவின் கணவர் ரித்திக் தன்வார் மற்றும் மாமனார் மனோஜ் ஆகிய இருவரையும் காவல்துறையினர் அதிரடியாகக் கைது செய்துள்ளனர். தற்போது தீபிகாவின் உடல் பிரேதப் பரிசோதனைக்கு அனுப்பப்பட்டுள்ளது என்றும், அறிக்கை வந்த பிறகு மரணத்திற்கான முழுமையான காரணம் தெரியவரும் என்றும் காவல்துறையினர் தெரிவித்துள்ளனர்.