நண்பர் ரஜினிகாந்த் விரைவில் நலம்பெற விழைகிறேன் - மு.க.ஸ்டாலின்..!

மருத்துவமனையில் அனுமதிக்கப்பட்டுள்ள நண்பர் சூப்பர்ஸ்டார் ரஜினிகாந்த்  அவர்கள் விரைந்து நலம் பெற விழைகிறேன் என முதலமைச்சர் மு.க.ஸ்டாலின் வாழ்த்தியுள்ளார்.  

நடிகர் ரஜினிகாந்த் வேட்டையன் திரைப்படத்தில் நடித்து முடித்துள்ள நிலையில், இந்தப் படம் விரைவில் திரைக்கு வர உள்ளது. இந்நிலையில் நடிகர் ரஜினிகாந்துக்கு  திடீரென உடல் நலக்குறைவு ஏற்பட்டு மருத்துவமனையில் அனுமதிக்கப்பட்டுள்ளார். நேற்றிரவு  திடீர் உடல்நலக்குறைவு ஏற்பட்டதால், இரவு  10.30 மணிக்கு ஆயிரம் விளக்கு பகுதியில் உள்ள தனியார் மருத்துவமனையில் அனுமதிக்கப்பட்டார். 

சீரற்ற ரத்த ஓட்டம் மற்றும் செரிமான பிரச்சனை காரணமாக நடிகர் ரஜினிகாந்த் ஏற்கனவே சிகிச்சை பெற்றிருந்த நிலையில் தற்போது மீண்டும் அனுமதிக்கப்பட்டிருப்பதாக தகவல் வெளியாகியுள்ளன. நேற்று இரவு முதல் சிகிச்சை அளிக்கப்பட்டு வரும் நிலையில், இன்று  காலை மூத்த மருத்துவர்களின் குழு மருத்துவ பரிசோதனைகள் மேற்கொள்ள உள்ளனர். நலமுடன் இருப்பதாகவும், கேத் லேப் மூலம் இருதயத்திற்கு செல்லும் ரத்த ஓட்டங்கள் சீராக உள்ளதா என்றும் பரிசோதனை மேற்கொள்ள உள்ளதாக தகவல் வெளியாகியுள்ளது.  

இந்நிலையில் ரஜினிகாந்த் விரைவில் நலம்பெற வேண்டும் என முதலமைச்சர் மு.க.ஸ்டாலின் தெரிவித்துள்ளார். இதுகுறித்து எக்ஸ் தளத்தில் பதிவிட்டுள்ள அவர், “மருத்துவமனையில் அனுமதிக்கப்பட்டுள்ள நண்பர் சூப்பர்ஸ்டார் ரஜினிகாந்த்  அவர்கள் விரைந்து நலம் பெற விழைகிறேன்” என்று குறிப்பிட்டுள்ளார்.