ஹேமா கமிட்டி பரிந்துரைகளை அமல்படுத்த வேண்டும் - மௌனம் கலைத்த நடிகர் மம்முட்டி..

மலையாள சினிமாவை உலுக்கி வரும்  நீதிபதி ஹேமா கமிட்டி பரிந்துரைகளை அமல்படுத்த வேண்டும் என நடிகர் மம்முட்டி வலியுறுத்தியுள்ளார். 

மலையாள திரையுலகில் நடிகைகள் மற்றும் பெண் கலைஞர்களுக்கு எதிரான பாலியல் துன்புறுத்தல்கள் நடைபெறுவதாக குற்றச்சாட்டு எழுந்தது. இதுகுறித்து விரிவான விசாரணை நடத்த  நீதிபதி ஹேமா தலைமையில் ஆணையம் அமைக்கப்பட்டது. இந்த ஹேமா கமிட்டியின் அறிக்கை, சில தினங்களுக்கு முன் வெளியாகி பரபரப்பை ஏற்படுத்தி வருகிறது. அதில், அதிகார மையத்தில் இருக்கும் நடிகர்கள், இயக்குநர்கள், தயாரிப்பாளர்களால்  நடிகைகள் உள்பட பெண் கலைஞர்கள் பாலியல் துன்புறுத்தலுக்கு ஆளானதாக தெரிவிக்கப்பட்டுள்ளது.  

ஹேமா கமிட்டி ரிப்போர்ட் வெளியான  பின்னர் பல நடிகைகள், தங்களுக்கும் பல்வேறு பாலியல் துன்புறுத்தல்கள் நடந்ததாக தற்போது கூறி வருகின்றனர்.   இதனையடுத்து  பாலியல் புகார்கள் குறித்து விசாரிக்க, சிறப்பு புலனாய்வு குழுவை கேரள அரசு அமைத்துள்ளது. அடுத்தடுத்து வரும் பாலியல் புகார்களால் மலையாள திரைப்பட நடிகர் சங்க( AMMA) தலைவர் மோகன்லால் உள்ளிட்ட அனைத்து நிர்வாகிகளும் கூண்டோடு ராஜினாமா செய்துள்ளனர். தொடர்ந்து நடிகர் மோகன்லால் உள்பட பலரும் இச்சம்பவம் குறித்து விளக்கமளித்து வருகின்றனர்.  

இந்நிலையில் நடிகர் மோகன்லாலை தொடர்ந்து நடிகர் மம்முட்டி மௌனம் கலைத்துள்ளார்.  மலையாள திரையுலகில் உள்ள அனைத்து அமைப்புகளும் ஒன்றிணைந்து ஹேமா கமிட்டி பரிந்துரைகளை அமல்படுத்த நடவடிக்கை எடுக்க வேண்டும். ஹேமா கமிட்டியின் முழு அறிக்கையும் நீதிமன்றத்தில் உள்ளது. போலீஸ் விசாரணை தீவிரமாக நடைபெற்று வருகிறது. குற்றம் செய்தவர்களுக்கான தண்டனையை நீதிமன்றம் முடிவு செய்யும் என்றும் நடிகர் மம்முட்டி கருத்து தெரிவித்துள்ளார். மலையாள திரையுலகில் அதிகார மையம் என்பது கிடையாது என்றும் அவர் குறிப்பட்டுள்ளார். ஹேமா கமிட்டி பரிந்துரைகளை நிறைவேற்றுவதில் தடங்கள் ஏற்பட்டால் சட்டத்தை இயற்றி செயல்படுத்த வேண்டும் எனவும்  அவர் வலியுறுத்தி உள்ளார்.