நகைப்பிரியர்களுக்கு மகிழ்ச்சி செய்தி.. சவரனுக்கு ரூ.320 குறைந்த தங்கம் விலை..

 சென்னையில் ஆபரணத் தங்கத்தின் விலை சவரனுக்கு ரூ. 320 குறைந்துள்ளது.   

தங்கம் அவ்வப்போது விலை உயர்வதும், குறைவதுமாக போக்கு காட்டிவந்தாலும், அடிப்படையில்  கனிசமாக ஏற்றம் கண்டுள்ளதே நிதர்சனம். மத்திய பட்ஜெட்டில் தங்கம் மற்றும் வெள்ளியின் இறக்குமதி வரு 15 % லிருந்து 6% ஆக குறைக்கப்பட்டதை அடுத்து, தங்கம் விலை தடாலடியாக குறைந்துவிடும் என்று மக்கள் எதிர்பார்த்தனர். அதற்கேற்ப சில நாட்கள் ரூ.5,000 வரை தங்கம் விலையும் குறைந்தது.  தொடர்ந்து குறையும் என எதிர்பார்த்த மக்களுக்கு ஏமாற்றமே மிச்சம் என்கிற வகையில், அடிக்கடி ஏற்றங்களை கண்டு வருகிறது.  

அந்தவகையில் நேற்று தங்கம் விலை அதிரடியாக சவரனுக்கு ரூ.400 உயர்ந்து ஒரு கிராம் ரூ. 6,720க்கும், ஒரு சவரன் ரூ. 53,760க்கும் விற்கப்பட்டது.   இதேபோல்  சில்லறை வர்த்தகத்தில் வெள்ளி விலை கிராமுக்கு ரூ. 2 உயர்ந்து, ஒரு கிராம் வெள்ளி ரூ.92க்கு விற்பனை செய்யப்பட்டது. இந்த நிலையில் இன்று தங்கம் விலை சவரனுக்கு ரூ.320 குறைந்துள்ளது. அதன்படி சென்னையில் இன்று  ஆபரணத்தங்கம் ஒரு கிராம் ரூ. 6,680க்கும், சவரன் ரூ.53,440க்கும் விற்பனை செய்யப்படுகிறது.  இதேபோல் சில்லறை வர்த்தகத்தில் வெள்ளி விலை கிராமுக்கு ரூ. 2.50 காசுகள் குறைந்து ரூ. 89.50க்கு விற்பனை செய்யப்படுகிறது.