கேஸ் சிலிண்டர் - 50 லட்சத்துக்கும் மேற்பட்டோர் E-KYC செய்யவில்லை

கேஸ் சிலிண்டருக்கான E-KYC பதிவுக்கு காலக்கெடு இன்றுடன் நிறைவடைந்தது. நாளை முதல் 50 லட்சத்துக்கும் மேற்பட்டோர் கேஸ் புக் செய்ய முடியாத சூழல் ஏற்படும்.

தமிழகம் முழுவதும் 50 லட்சத்துக்கும் மேற்பட்டோர் E-KYC செய்யவில்லை. இதுவரை 85% வாடிக்கையாளர்கள் E-KYC பதிவு செய்துள்ளதாக தகவல். கேஸ் விநியோக நிறுவனங்களில் E-KYC பதிவு செய்ய அறிவுறுத்தல். எண்ணெய் நிறுவனங்களின் செயலிகள் மூலம் E-KYC பதிவு செய்யலாம். தமிழகத்தில் 15% பேர் E-KYC பதிவு செய்யவில்லை என தகவல்கள் தெரிவிக்கின்றன.

பாரத் கேஸ் வாடிக்கையாளர்கள் செய்ய வேண்டியது!

இ-கேஒய்சி செயல்முறையை முடிக்க, பாரத் கேஸ் வாடிக்கையாளர்கள் முதலில் ஹலோ BPCL செயலியைப் பதிவிறக்கம் செய்ய வேண்டும். உங்கள் எல்பிஜி பதிவு செய்யப்பட்ட மொபைல் எண்ணை உள்ளிட்டு உள்நுழைந்து, உங்கள் மொபைலுக்கு வந்த ஓடிபி மூலம் எண்ணைச் சரிபார்க்க வேண்டும். அடுத்து, உங்கள் பாரத் கேஸ் இணைப்பைத் தேர்ந்தெடுத்து, இ-கேஒய்சி அல்லது ஆதார் சரிபார்ப்பு விருப்பத்திற்குச் செல்ல வேண்டும். ஆதார் அங்கீகாரத்திற்கு உங்கள் சம்மதத்தை அளித்து, ஆதார் ஃபேஸ் ஆர்டி செயலியைப் பயன்படுத்தி கொடுக்கப்பட்டுள்ள வழிமுறைகளைப் பின்பற்றி உங்கள் முகத்தை ஸ்கேன் செய்ய வேண்டும். முகத்தை ஸ்கேன் செய்யும் செயல்முறை முடிந்ததும் உங்கள் விவரங்களைச் சமர்ப்பித்து, திரையில் தோன்றும் இ-கேஒய்சி நிறைவு செய்தியைச் சரிபார்க்க வேண்டும்.

இண்டேன் எல்பிஜி வாடிக்கையாளர்கள் தங்கள் வீடுகளில் இருந்தபடியே தங்கள் இ-கேஒய்சி சரிபார்ப்பை எளிதாக முடிக்கலாம். முதலில், உங்கள் ஸ்மார்ட்போனில் இந்தியன்ஆயில் ஒன் செயலியைப் பதிவிறக்கம் செய்து திறக்க வேண்டும். உங்கள் எல்பிஜி இணைப்புடன் பதிவுசெய்யப்பட்ட மொபைல் எண்ணைப் பயன்படுத்தி உள்நுழையவும்; அல்லது பதிவு செய்யவும். தேவைப்பட்டால், உங்கள் 16-இலக்க எல்பிஜி ஐடியை உள்ளிட்டு உங்கள் இண்டேன் கணக்கை இணைக்க வேண்டும். பின்னர், செயலியில் இ-கேஒய்சி அல்லது ஆதார் அங்கீகார விருப்பத்தைத் தேடி, ஆதார் அடிப்படையிலான சரிபார்ப்புக்கு ஒப்புதல் தர வேண்டும். ஆதார் ஃபேஸ் ஐடி செயலியைத் திறந்து, அறிவுறுத்தல்களின்படி உங்கள் முக ஸ்கேனை முடிக்க வேண்டும். முக ஸ்கேன் முடிந்ததும் சரிபார்ப்பைச் சமர்ப்பித்து, இ-கேஒய்சி நிறைவடைந்ததை உறுதிப்படுத்தும் செய்திக்காகக் காத்திருக்க வேண்டும்.

ஹெச்பி கேஸ் வாடிக்கையாளர்கள் செய்ய வேண்டியது!

ஹிந்துஸ்தான் பெட்ரோலியம் (HPCL) வாடிக்கையாளர்கள் தங்கள் மொபைல் ஃபோனில் ஹெச்பி பே (HP Pay) செயலியைப் பதிவிறக்கம் செய்து திறக்க வேண்டும். உங்கள் ஹெச்பி கேஸ் இணைப்புடன் இணைக்கப்பட்ட மொபைல் எண்ணைப் பயன்படுத்தி உள்நுழையவும் அல்லது பதிவு செய்ய வேண்டும். உங்கள் ஹெச்பி கேஸ் கணக்கைத் தேர்ந்தெடுத்து, இ-கேஒய்சி அல்லது ஆதார் அங்கீகார விருப்பத்தைக் கிளிக் செய்ய வேண்டும். ஆதார் சரிபார்ப்பிற்கான சம்மதத்தைக் குறிக்கும் செய்தி திரையில் தோன்றும்போது, ஆதார் ஃபேஸ் ஆர்டி (Aadhaar Face RD) செயலியைப் பயன்படுத்தி உங்கள் முகத்தை ஸ்கேன் செய்ய வேண்டும். முக ஸ்கேன் வெற்றிகரமாக முடிந்தவுடன் அங்கீகாரத்தைச் சமர்ப்பித்து, செயலியில் உள்ள E-KYC உறுதிப்படுத்தலைச் சரிபார்க்க வேண்டும்.

வாடிக்கையாளர்கள் ஆகஸ்ட் 23ஆம் தேதிக்குள் தங்களுடைய e-KYC சரிபார்ப்பை முடிக்கத் தவறினால் LPG இணைப்பு நிரந்தரமாக ரத்து செய்யப்படும் என்று அர்த்தமல்ல. இருப்பினும், e-KYC செயல்முறை முடியும் வரை எரிவாயு இணைப்பு தற்காலிகமாக இடைநிறுத்தப்படலாம். மேலும், e-KYC நிலுவையில் இருந்தால் மானிய விலையில் சிலிண்டர் பெறுவது கடினமாகும்.