சிங்கப்பூர் மருத்துவமனையிலிருந்து திரும்பிய எ.வ.வேலு அதிரடி பிரஸ்மீட்!

சிங்கப்பூரில் மருத்துவச் சிகிச்சை பெற்று வரும் திமுக முன்னாள் அமைச்சர் எ.வ. வேலு அதிரடியான விளக்கங்களை வெளியிட்டுள்ளார். அரசியல் பழிவாங்கும் நடவடிக்கைகளுக்கு அஞ்சி தாம் ஓடவோ அல்லது பதுங்கவோ இல்லை என்று திட்டவட்டமாகக் கூறியுள்ள அவர், “அரசியல் களத்தில் ஓடுவது, ஒழிவது, பதுங்குவது என்ற பேச்சுக்கே திராவிட முன்னேற்றக் கழகத்திலோ அல்லது திராவிட இயக்கத்திலோ இடமில்லை; எங்களின் தலைவர் மு.க. ஸ்டாலினோ அல்லது கலைஞர் அவர்களோ எங்களை அப்படி ஒன்னும் பயந்து வளர்க்கவில்லை” என மிக ஆக்ரோஷமாகத் தெரிவித்துள்ளார்.

தாம் சட்டத்திற்குப் பயந்து சிங்கப்பூருக்குத் தப்பியோடிவிட்டதாக ஊடகங்களில் பரவி வரும் வதந்திகளுக்குத் தனது மருத்துவ ஆவணங்கள் மற்றும் பயண டிக்கெட்டுகளைச் சான்றாக முன்வைத்து எ.வ. வேலு மறுப்புத் தெரிவித்துள்ளார். கடந்த 2016-ஆம் ஆண்டு முதலே சிங்கப்பூர் மவுண்ட் எலிசபெத் மருத்துவமனையின் (Mount Elizabeth Hospital) இதயப் பிரிவு நிபுணர் டாக்டர் ஜெயராம லிங்க விநாயக்கர் என்பவரிடம் தாம் தொடர்ந்து இதயச் சிகிச்சை பெற்று வருவதாக அவர் குறிப்பிட்டுள்ளார். ஐந்து ஆண்டுகால இடைவிடாத ஆட்சிப் பணிகளுக்குப் பிறகு, தேர்தல் முடிவடைந்த நிலையில் வழக்கமான முழு உடல் பரிசோதனைக்காகவே கடந்த ஜூன் 15-ஆம் தேதியே விசா விண்ணப்பித்து, ஜூன் 17-ல் விசா மற்றும் விமான டிக்கெட்டுகளைப் பெற்றதாக அவர் விவரித்துள்ளார்.

கடந்த ஜூன் 25-ஆம் தேதி அதிகாலை 7 மணிக்குத் தனது இல்லத்தில் லஞ்ச ஒழிப்புத்துறையினர் சோதனை நடத்த வந்தபோது, அன்றைய தினம் மதியம் 2:20 மணிக்குத் தாம் சிங்கப்பூர் செல்லவிருந்த இண்டிகோ விமான டிக்கெட்டைச் சோதனை அதிகாரிகளிடமே காட்டியதாக வேலு கூறியுள்ளார். விசாரணைக்கு முழு ஒத்துழைப்பு வழங்கிய பின், மறுநாள் ஜூன் 26-ஆம் தேதியே டிக்கெட்டை மாற்றி அதிகாரப்பூர்வமாகவே தாம் சிங்கப்பூர் வந்ததாகக் குறிப்பிட்டுள்ளார். தமக்கு ஜூன் 30 மற்றும் ஜூலை 4 ஆகிய தேதிகளில் அனுப்பப்பட்ட லஞ்ச ஒழிப்புத்துறைச் சம்மன்களுக்குத் தாம் ஜூலை 12-ல் தாயகம் திரும்புவதாக ஏற்கனவே எழுத்துப்பூர்வமாகப் பதிலளித்திருந்ததையும் அவர் சுட்டிக்காட்டியுள்ளார்.

இதற்கிடையில், முன்னாள் அமைச்சர் எ.வ. வேலுவை ஜூலை 9 அன்று ஆஜராகத் தவறினால் கைது செய்ய நேரிடும் என லஞ்ச ஒழிப்புத்துறை விடுத்த எச்சரிக்கை மற்றும் லுக்அவுட் நோட்டீஸிற்கு சென்னை உயர் நீதிமன்றம் அண்மையில் இடைக்காலத் தடை விதித்து உத்தரவிட்டுள்ளது. 70 வயதைக் கடந்த ஒரு இதய நோயாளிக்குக் கால அவகாசம் வழங்காமல் அவசரப்படுத்துவதை எதிர்த்த அவரது மேல்முறையீட்டை ஏற்ற நீதிமன்றம், ஜூலை 12-ல் அவர் சிங்கப்பூரிலிருந்து திரும்பியதும், ஜூலை 15-ஆம் தேதி விசாரணை அதிகாரி முன்னிலையில் ஆஜராக நிபந்தனை விதித்துள்ளது. நீதிமன்ற உத்தரவுப்படி தாம் சட்டத்தை எதிர்கொள்ள முழுத் தயார் நிலையில் இருப்பதாகத் தெரிவித்துள்ள வேலுவின் இந்த பிரஸ்மீட் விபரம் தற்பொழுது தமிழக அரசியலில் பெரும் பரப்பை ஏற்படுத்தியுள்ளது.