"ஆன்மிக பிரசாரம் மூலம் சிறுபான்மையினரின் வாக்குகளை பெற சிலர் முயற்சி"- ஆர்.எஸ்.பாரதி

அரசு பள்ளியில் படித்து கடுமையான நீட் தேர்வை எதிர்கொண்டு மருத்துவ கல்லூரியில் இடம் கிடைத்த மாணவர்கள் படித்த தமிழ்நாட்டின் கல்வி எந்த அளவுக்கு தரமானது என்பதை கருத்து குருடராக கண் தெரியாத கேஷுவல் லேபர் ஆக பதவி முடிந்தும் பதவியில் ஒட்டிக் கொண்டிருக்கும் ஆளுநர் தெரிந்து கொண்டு பேச வேண்டும் என  திமுக அமைப்பு செயலாளர் ஆர்.எஸ்.ஃச் தெரிவித்துள்ளார்.

முத்தமிழ் அறிஞர் கலைஞர் 101- வது பிறந்த நாளை முன்னிட்டு நெல்லை மத்திய மாவட்ட திமுக சார்பில் அரசு மேல்நிலைப்பள்ளியில் பயின்று மருத்துவக்கல்லூரிக்கு செல்லும் மாணவர்களுக்கு பாராட்டு, திமுக தலைமைக் கழக பேச்சாளர்களுக்கு பாராட்டு மற்றும் திமுக தொண்டரணி நிர்வாகிகளுக்கு சீருடை வழங்கும் விழா ஆகிய முப்பெரும் விழா நெல்லை மத்திய மாவட்ட திமுக அலுவலகத்தில் மாவட்ட பொறுப்பாளர் டி.பி.எம்.மைதீன்கான் தலைமையில் நடைபெற்றது. இந்த நிகழ்ச்சியில் சிறப்பு அழைப்பாளராக கலந்து கொண்ட திமுக அமைப்பு செயலாளர் ஆர்.எஸ்.பாரதி மருத்துவக்கல்லூரிகளுக்கு செல்லும் மாணவிகளுக்கு மருத்துவ சீருடையும், தலைமைக்கழக பேச்சாளர்களுக்கு பரிசும், தொணரணியினருக்கு சீருடையும் வழங்கினார்.

இதனைத்தொடர்ந்து கட்சி நிர்வாகிகள் மத்தியில் உரையாற்றிய ஆர்.எஸ்.பாரதி, “அமெரிக்காவில் திமுக தலைவர் இருந்தாலும் கூட கட்சியின் நிகழ்வுகள் தொடர்பான தகவல்களை கேட்டு பல்வேறு அறிவுரைகளை வழங்கி வருகிறார். அமெரிக்காவில் இருந்தாலும் தொண்டனையும் கட்சியையும் பற்றி சிந்திக்க கூடியவர் தான் நம்முடைய தலைவர். இதைப்பற்றி தெரியாத சிலர் அமெரிக்காவிற்கு சிகிச்சைக்கு போயிருக்கிறார், இதற்கு போய் இருக்கிறார், அதற்கு போய் இருக்கிறார் என பொறாமையில் பேசி வருகிறார்கள். திமுகவை பார்த்து எல்லோரும் பொறாமை பட ஆரம்பித்து விட்டார்கள். நாளுக்கு நாள் ஆட்சிக்கு பெருமை கிடைத்து வருகிறது. எங்கு பார்த்தாலும் திமுக கொடி பட்டோலி வீசி பறந்து வருவதை பார்த்து பொறுத்துக் கொள்ள முடியாமல் சிலர் நாளுக்கு நாள் அறிக்கையை விட்டுக் கொண்டிருக்கிறார்கள். கட்டுக்கோப்பான இயக்கம் திமுக. தலைவர் ஒரு அறிக்கை விட்டால் கூட கட்சியில் உள்ளவர்கள் கிடுகிடுவென ஆடும் நிலை தற்போது உள்ளது.

மக்கள் திமுகவிற்கு ஓட்டு போட தயாராகி விட்டார்கள். புதுப்புது எதிரிகள் தோன்றியிருக்கிறார்கள் அவர்களெல்லாம் எதையும் செய்வார்கள். ஆன்மீகத்தின் மூலமாக கல்வித்துறையில் ஊடுருவி பிரச்சாரம் செய்து சிறுபான்மை வாக்குகளை நம்மிடம் இருந்து பெற்று விடலாம் என்ற சதி நடக்கிறது. அதையெல்லாம் முறியடிக்கும் வல்லமை திமுக தொண்டனிடம் மட்டும் தான் உள்ளது. நெல்லை மாவட்டத்தில் அரசு பள்ளியில் படித்த ஒன்பது பேர் மருத்துவக் கல்லூரிகளில் சேர்ந்துள்ளனர். தமிழகத்தில் கல்வி தரம் சரியில்லை என கூறிய குருடர் அந்த ஒன்பது பேரை பார்த்து தெரிந்து கொள்ள வேண்டும். ஏழை, எளிய மாணவர்கள் கஷ்டப்பட்டு படித்து நீங்கள் வைத்து நெருக்கடியான நீட் தேர்வில் கூட வெற்றி பெற்று மருத்துவர்கள் ஆகியுள்ளனர். தமிழ்நாட்டில் உள்ள கல்வித்தரம் எந்த அளவுக்கு தரமாக உள்ளது என்பதை கருத்து குருடராக கண் தெரியாத கேஸ்வல் லேபராக பதவி முடிந்தும் பதவியில் ஒட்டிக் கொண்டிருக்கும் ஆளுநர் தெரிந்து கொண்டு பேச வேண்டும். பொதுக்கூட்டத்திற்கு கட்சி தொண்டர்களை அழைத்து வந்தாலே கூட்டம் அதிகமாக இருக்கும். யார் யாரையோ அழைத்து வருவதால் 8 மணிக்கு மேல் யாரும் கூட்டத்தில் இருப்பது இல்லை” என்றார்.