“பாலியல் தாக்குதலில் இருந்து நாம்தான் பாதுகாப்பாக இருக்க வேண்டும்”- கூல் சுரேஷ்

நாம் தமிழர் கட்சியில் இருந்து விலகிய காளியம்மாள் மட்டுமல்ல, அமெரிக்க அதிபர் ட்ரம்ப் வந்தாலும் கூல் சுரேஷின் சி.எஸ்.கே கட்சி உள்ளது. அவர்கள் கட்சியில் சேர்ந்தால் சிவப்பு கம்பளம் விரித்து வரவேற்பேன் என நடிகர் கூல் சுரேஷ் கூறியுள்ளார்.

கரூரில் செய்தியாளர்களிடம் பேசிய காமெடி நடிகர் கூல் சுரேஷ், “பாலியல் குற்றம் என்பது அரசாங்கம் மற்றும் காவல்துறையை மட்டும் குற்றம் சொல்ல முடியாது. நம்மிடமும் விழிப்புணர்வு இருக்க வேண்டும். எல்லா இடத்திற்குமே போலீசார் பின்னாடியே வர முடியாது. 8 கோடி மக்கள் தொகை இருக்கிறது. விழிப்புணர்வுடன் இருக்க வேண்டும். முடிந்த அளவிற்கு குற்றங்கள் குறைப்பதற்கு இரவு நேரத்தில் வெளியே செல்லக்கூடாது. அதிகம் நகைகளை அணிந்து கொண்டு சென்றால், பார்ப்பவர்களுக்கு திருட வேண்டும் என்று தோன்றுவதற்கு ஒரு எண்ணமாக அமைந்து விடுகிறது‌. அதனால் திருட்டு மற்றும் பாலியல் தாக்குதலில் இருந்து நாம்தான் பாதுகாப்பாக இருக்க வேண்டும்.

சீமான் விசயத்தில் காவல்துறையினர் விசாரணை மேற்கொண்டு வருகின்றனர். அது குறித்து சீமான் பதில் அளித்துள்ளார். நடிகை அளித்த பதிலும் ஒன்றாக இருக்கின்றதா அல்லது வேறுபட்டு உள்ளதா என்ற விசாரணை நடைபெற்று வருகிறது. இந்த வழக்கு நீதிமன்றத்தில் இருப்பதால் சீமான் அண்ணன் மீது தவறில்லை என்றால் இல்லை என்று சட்டம் சொல்லும், தவறு இருந்தால் அது தவறு உள்ளது என்றும் சட்டம் சொல்லும். விரைவில் அதற்கான அறிவிப்பு வெளியே வரும்” என்றார்.

தமிழக வெற்றி கழகத்தில் இணைய வாய்ப்புள்ளதா என்று செய்தியாளர்கள் கேள்வி எழுப்பியதற்கு, எனக்கு ஒரு கட்சி உள்ளது, சிஎஸ்கே கட்சி. அதில் தமிழக வெற்றி கழகம் அல்ல திமுக, அதிமுக, பிஜேபி, பாமக எந்த கட்சியாக இருந்தாலும், மக்களுக்காக உழைப்பதற்காக கூல் சுரேஷ் கட்சி காத்துக் கொண்டுள்ளேன். எந்த கட்சி கூட வேணாலும் கூட்டணி சேர்ந்து கண்டிப்பாக மக்களுக்காக உழைப்பதற்கு தயாராக உள்ளேன். சிஎஸ்கே கட்சியில் நாம் தமிழர் கட்சியில் இருந்து விலகிய காளியம்மாள் எங்கள் கட்சியில் இணைய கூடாதா?, காளியம்மாள் எங்கள் கட்சியில் இணைய வந்தால் சிகப்பு கம்பளம் தயாராக இருக்கிறோம். யார் வேண்டுமானாலும் வரலாம் அமெரிக்கா ட்ரம்ப் வந்தாலும் சிகப்பு கம்பளம் தயாராக இருக்கும். நாம் தமிழர் கட்சியிலிருந்து விலகி உள்ள காளியம்மாள் நீங்கள் எங்கள் கட்சியில் இணைய வேண்டும் என்று நினைத்தால் கண்டிப்பாக வாங்கள் உங்களுக்காக உழைப்பதற்காக காத்துக் கொண்டிருப்பது தான் கூல் சுரேஷ் கட்சி” எனக் கூறினார்.