குவியும் வாழ்த்துக்கள்..! ராணுவ அகாடமியில் தேர்ச்சி பெற்ற முதல் பெண் அதிகாரி..!

உத்தரகாண்ட் மாநிலம் டேராடூனில் அமைந்துள்ள புகழ்பெற்ற இந்திய ராணுவ அகாடமியில் (Indian Military Academy - IMA) ஒரு புதிய வரலாறு படைக்கப்பட்டுள்ளது. 1932 ஆம் ஆண்டு பிரிட்டிஷ் ஆட்சிக் காலத்தில் தொடங்கப்பட்ட இந்த அகாடமியில் இதுவரை 67 ஆயிரத்துக்கும் மேற்பட்ட ஆண்கள் பட்டம் பெற்று ராணுவத்தில் இணைந்துள்ளனர். இந்த நீண்ட பாரம்பரியத்தில் முதன்முறையாக, 23 வயதான சாய் ஜாதவ் என்ற இளம் பெண் அதிகாரி பட்டம் பெற்றுள்ளதன் மூலம், இந்த அகாடமியில் பட்டம் பெற்ற முதல் பெண் என்ற பெருமையைப் பெற்றுள்ளார்.

மகாராஷ்டிரா மாநிலம் கோலாப்பூரைச் சேர்ந்த சாய் ஜாதவ், ராணுவத்தில் சீருடை அணியும் நான்காவது தலைமுறை உறுப்பினராவார். அவரது கொள்ளுத்தாத்தா பிரிட்டிஷ் ராணுவத்திலும், தாத்தா இந்திய ராணுவத்திலும் பணியாற்றியவர்கள். மேலும், அவரது தந்தை சந்தீப் ஜாதவ் இன்றும் இந்திய ராணுவத்தில் தொடர்ந்து பணியாற்றி வருவது குறிப்பிடத்தக்கது. இத்தகைய இராணுவப் பாரம்பரியமிக்க குடும்பத்தில் இருந்து வந்த சாய், அகாடமியில் இருந்த மிக முக்கியமான ஒரு தடையை உடைத்துள்ளார்.

கடினமான ராணுவப் பயிற்சியை வெற்றிகரமாக நிறைவு செய்த சாய் ஜாதவ், தற்போது பிரதேச ராணுவத்தில் லெப்டினன்ட் ஆகப் பணி நியமனம் செய்யப்பட்டுள்ளார். ஒரு நூற்றாண்டு காலப் பெருமை கொண்ட அகாடமியில் ஒரு பெண் அதிகாரி பட்டம் பெற்றிருப்பது, இந்திய ராணுவத்தில் பெண்களுக்கு அதிகரித்து வரும் வாய்ப்புகளையும், சமத்துவத்தையும் எடுத்துக்காட்டுவதாக அமைந்துள்ளது.

சாய் ஜாதவ் படைத்துள்ள இந்தச் சாதனை, இராணுவத்தில் சேர விரும்பும் நாட்டின் இளம் பெண்களுக்கு ஒரு பெரிய உத்வேகத்தை அளிப்பதாகும். இந்த அரிய வரலாற்றுச் சாதனைக்காக, சாய் ஜாதவுக்குப் பல்வேறு தரப்பினரும், முன்னாள் ராணுவ அதிகாரிகளும், பொதுமக்கள் அமைப்புகளும் பாராட்டுகளையும், வாழ்த்துகளையும் தெரிவித்து வருகின்றனர்.