சென்னை சூப்பர் கிங்ஸ் அணி மும்பையில் இருந்து சென்னை வந்தது.
இந்தியாவின் மிகப்பெரிய கிரிக்கெட் திருவிழாவான இந்தியன் பிரீமியர் லீக் போட்டிகள் நாடு முழுவதும் கோலாகலமாக நடைபெற்று வருகின்றன. ரசிகர்கள் உற்சாகக் குரல்களுடன் மைதானங்களை நிரப்பி வரும் நிலையில், ஒவ்வொரு ஆட்டமும் பரபரப்பை ஏற்படுத்தி வருகிறது.
இந்த நிலையில், மும்பை வான்கடை மைதானத்தில் நேற்று இரவு நடைபெற்ற முக்கிய ஆட்டத்தில் சென்னை சூப்பர் கிங்ஸ் மற்றும் மும்பை இந்தியன்ஸ் அணிகள் மோதின. பரபரப்பாக நடைபெற்ற இந்த ஆட்டத்தில் சென்னை அணி சிறப்பான விளையாட்டை வெளிப்படுத்தி, 100 ரன்கள் வித்தியாசத்தில் அபார வெற்றி பெற்றது. இந்த வெற்றியைத் தொடர்ந்து, அடுத்த ஆட்டத்திற்கான தயாரிப்பில் ஈடுபட சென்னை அணியினர் மும்பையிலிருந்து விமானம் மூலம் சென்னை வந்தடைந்தனர். சென்னை விமான நிலையத்தில் அணியினருக்கு உற்சாக வரவேற்பு அளிக்கப்பட்டது. தொடர்ந்து, பாதுகாப்பு ஏற்பாடுகளுடன் சொகுசு பேருந்தில் நகரின் நட்சத்திர விடுதிக்கு அழைத்துச் செல்லப்பட்டனர்.
வரும் ஏப்ரல் 26ஆம் தேதி (ஞாயிற்றுக்கிழமை), சென்னை அணி தனது அடுத்த லீக் ஆட்டத்தில் குஜராத் டைட்டன்ஸ் அணியை எதிர்கொள்ள உள்ளது. இந்த ஆட்டமும் ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது.