உடைந்த உறவுகள் கற்பழிப்பு அல்ல: பாலியல் வன்கொடுமை வழக்கை ரத்து செய்து உச்ச நீதிமன்றம் அதிரடி!

மகாராஷ்டிராவைச் சேர்ந்த ஒரு பெண் மற்றும் ஒரு வழக்கறிஞர் ஆகியோருக்கு இடையேயான உறவு பற்றிய வழக்கில் உச்ச நீதிமன்றம் ஒரு முக்கியமான தீர்ப்பை வழங்கியுள்ளது. அந்தப் பெண், தனது முந்தைய கசப்பான அனுபவங்கள் காரணமாக திருமணத்திற்கு மறுத்த போதிலும், இருவரும் மூன்று ஆண்டுகளாக நெருங்கிப் பழகினர். இந்தப் பழக்கத்தின் விளைவாக அப்பெண் கர்ப்பம் தரித்து, கருக்கலைப்பும் செய்துள்ளார்.

பின்னர் திருமணம் செய்ய வலியுறுத்தியபோது வழக்கறிஞர் மறுத்துவிட்டதால், அவர் மீது சத்ரபதி சாம்ராஜ்நகர் காவல் நிலையத்தில் பாலியல் வன்கொடுமைப் புகார் அளிக்கப்பட்டது. மும்பை உயர் நீதிமன்றம் இவ்வழக்கை ரத்து செய்ய மறுத்ததை அடுத்து, வழக்கறிஞர் உச்ச நீதிமன்றத்தில் மேல்முறையீடு செய்தார். நீதிபதிகள் நாகரத்னா மற்றும் மகாதேவன் அடங்கிய அமர்வு இந்த வழக்கை விசாரித்து, வழக்கறிஞர் மீது தொடரப்பட்ட பாலியல் வன்கொடுமை வழக்கை ரத்து செய்து உத்தரவிட்டது.

நீதிபதிகள் தங்கள் தீர்ப்பில், தோல்வியுற்ற ஆண்-பெண் உறவுகளில் பாலியல் வன்கொடுமை சாயம் பூசுவது கண்டனத்துக்குரியது மற்றும் கவலைக்குரியது என்று கடுமையாகத் தெரிவித்தனர். ஒவ்வொரு கசப்பான உறவையும் கற்பழிப்பு குற்றமாக மாற்றுவது, குற்றத்தின் தீவிரத்தை அற்பமாக்குவதுடன் மட்டுமல்லாமல், குற்றம் சாட்டப்பட்டவருக்கு அழிக்க முடியாத களங்கத்தையும் கடுமையான அநீதியையும் ஏற்படுத்துகிறது என்று சுட்டிக்காட்டினர். பாலியல் வன்கொடுமை என்பது மிகக் கடுமையான குற்றங்களில் ஒன்றாகும் என்பதால், உண்மையான பாலியல் வன்முறை, கட்டாயம் அல்லது சுதந்திரமான ஒப்புதல் இல்லாத சந்தர்ப்பங்களில் மட்டுமே அது பயன்படுத்தப்பட வேண்டும் என்று வலியுறுத்தினர். மேலும், ஒரு உறவு திருமணத்தில் முடியாமல் போனதால், அந்த உறவின்போது ஏற்பட்ட உடல் ரீதியான நெருக்கத்தைப் பின்னோக்கிப் பார்த்து பாலியல் வன்கொடுமைக் குற்றமாக முத்திரை குத்த முடியாது என்றும் நீதிபதிகள் கருத்து தெரிவித்தனர்.

தோல்வியடைந்த அல்லது உடைந்த உறவுகளுக்குக் குற்றச்சாயல் கொடுக்கப்படும் கவலையளிக்கும் போக்கு அதிகரித்து வருவதாகவும் நீதிமன்றம் வருத்தம் தெரிவித்தது.