#BREAKING : ரெப்போ வட்டி விகிதம் 0.25% குறைவு..! வீட்டு லோன், கார் லோன் EMI குறையுது!

கடந்த சில ஆண்டுகளாக ரெப்போ விகிதம் 6.50% ஆக இருந்த நிலையில், கடந்த பிப்ரவரி மாதம் 0.25% குறைக்கப்பட்டு, 6.25% ஆக இருந்தது. அடுத்த இரண்டு மாதங்களில் (ஏப்ரல்) அது மேலும் 0.25 அடிப்படை புள்ளிகள் குறைக்கப்பட்டு 6% ஆக மாற்றப்பட்டது.

இந்நிலையில், கடந்த ஜூன் மாதம் 0.50 அடிப்படை புள்ளிகள் குறைக்கப்பட்டு ரெப்போ வட்டி விகிதம் 5.5% ஆக குறைக்கப்பட்டுள்ளது. அதனை தொடர்ந்து ஆகஸ்ட் மாதம் நடைபெற்ற ரிசர்வ் வங்கியின் நிதிக் கொள்கைக் குழு ஆலோசனைக் கூட்டத்தில் ரெப்போ விகிதத்தில் மாற்றம் ஏதும் இல்லாமல் 5.50 சதவீதமாக தொடர்ந்து நீடிக்கும் என அறிவிக்கப்பட்டது.

இந்நிலையில் வங்கிகளுக்கான குறுகிய காலக் கடனுக்கான ரெப்போ வட்டி விகிதம் 0.25% குறைக்கப்பட்டுள்ளது. ரிசர்வ் வங்கியின் நாணய கொள்கைக் குழு கூட்டத்தில் இந்த முடிவு எடுக்கப்பட்டதாக தெரிகிறது. இதனை ரிசர்வ் வங்கி ஆளுநர் சஞ்சய் மல்ஹோத்ரா அறிவித்தார். இதன் மூலம் ரெப்போ வட்டி விகிதம் 5.50%இல் இருந்து தற்போது 5.25%ஆக குறைந்துள்ளது. ரெப்போ ரேட் என்பது இந்திய ரிசர்வ் வங்கி, வணிக வங்கிகளுக்கு கடன் வழங்கும் வட்டி விகிதமாகும். 

இத்தகைய வட்டி குறைப்பு, கடன் பெறுவதை மலிவாக்கும். வங்கிக் கடன்கள் மற்றும் வீட்டுக் கடன்கள் போன்றவை வாங்க எளிதாக மாறும். இது முதலீட்டையும், நுகர்வோர் செலவினங்களையும் ஊக்குவித்து, வணிகங்களுக்கும், குறிப்பாகக் கடன் தேவைப்படும் தனிநபர்களுக்கும் பெரிதும் பயனளிக்கும்.