முருக பக்தர்கள் மாநாட்டில் பெரியார், அண்ணாவை விமர்சித்து வீடியோவா? நான் பார்க்கவே இல்லையே- நயினார் நாகேந்திரன்

முருக பக்தர்கள் மாநாட்டில் பெரியார், அண்ணாவை விமர்சித்த வீடியோவை நான் பார்க்கவில்லை என தமிழ்நாடு பாஜக தலைவர் நயினார் நாகேந்திரன் கூறினார்.

கோவை விமான நிலையத்தில் செய்தியாளர்களை சந்தித்த பாரதிய ஜனதா கட்சியின் மாநில தலைவர் நயினார் நாகேந்திரன், “மதுரை மாநாட்டிற்கு யாரும் வர மாட்டார்கள் என திமுக சொன்னது. ஆனால் மாநாட்டிற்கு முதல் நாள் மூன்று லட்சம் பேர் வந்திருந்தார்கள். நேற்று மாநாட்டின் பொழுது 5 லட்சம் பேர் வந்திருந்தார்கள். சிறு அசம்பாவிதம் கூட இல்லாமல் நடந்து முடிந்து இருக்கின்றது. காவல்துறையினர் ஒருவர் கூட அந்த வளாகத்தில் இல்லை. அனைவரும் கட்டுப்பாட்டுடன் இருந்து மாநாட்டில் பங்கேற்று திரும்பினர். தோல்வி பயத்தில் திமுகவினர் தற்பொழுது பேசிக் கொண்டு இருக்கின்றனர். திமுகவினர் நாங்கள் செய்யாததை தான் பேசிக் கொண்டு இருப்பார்கள். நேற்றைய மாநாட்டில் பக்தி, பாடல்கள், நடனம், பரத நாட்டியம் என நடந்தது.

முருக பக்தர்கள் மாநாட்டில் பெரியார், அண்ணாவை விமர்சித்த வீடியோவை நான் பார்க்கவில்லை. அதை பார்த்துவிட்டு கண்டிப்பாக  பேசுகிறேன். அதிமுக முன்னாள் அமைச்சர்கள் முன்னிலையில் திராவிடத்தை ஒழிப்போம் என வீடியோ போடுவது சரியா? பேசியது எனக்கு தெரியாது. நேற்று நிகழ்ச்சி முடிந்தவுடன் இங்கு வந்து விட்டோம். அது என்னவென்று பார்த்துவிட்டு பதில் சொல்கிறேன்” என்றார். முன்னதாக முருக பக்தர்கள் மாநாட்டில் பெரியார்,அண்ணாவை விமர்சித்த வீடியோ ஒளிபரப்பியது வருத்தமளிப்பதாக அதிமுக முன்னாள் அமைச்சர் ராஜேந்திர பாலாஜி கூறினார்.