பெரியார் குறித்து சீமான் பேசியது சரியே! என்னிடம் ஆதாரம் உள்ளது- அண்ணாமலை

பெரியார் குறித்து சீமான் அண்ணனின் பேச்சுக்கு ஆதரவான ஆதரங்களை நான் தருகிறேன் எனவும் பெரியார் பேசிய பேச்சுக்களை பொதுவெளியில் பேச முடியாது எனவும் பாஜக தலைவர் அண்ணாமலை தெரிவித்துள்ளார். 

திருப்பூர் மாவட்டம் பல்லடம் பகுதியில் நடைபெற்ற மூவர் படுகொலை சம்பவத்திற்கு நீதி கேட்டு பாஜக சார்பில் இன்று மாலை போராட்டம் நடைபெறுகிறது. இதில் கலந்து கொள்வதற்காக விமானம் மூலம் கோவை வந்த பாஜக மாநில தலைவர் அண்ணாமலை செய்தியாளர்களை சந்தித்தார். செய்தியாளர் சந்திப்பில் அண்ணாமலை பேசியதாவது, அண்ணா பல்கலைக்கழக வளாகத்தில் மாணவி பாலியல் வன்கொடுமை செய்யப்பட்ட சம்பவத்தில் கடந்த 15 நாட்களாக திமுக அமைச்சர்கள் பல்வேறு விதமாக கருத்துக்களை தெரிவித்து வந்தனர். குறிப்பாக அதன் இரண்டாம் கட்ட தலைவர்கள் ஞானசேகரன் திமுகவில் இல்லை என கூறினர். சட்டத்துறை அமைச்சர் ரகுபதி அவர் திமுகவில் இல்லை என தெரிவித்தார். இப்போது சட்டப்பேரவையில் முதல்வர் ஸ்டாலின், ஞானசேகரன் கட்சியின் அனுதாபி எனக் கூறி தப்பிக்க முயல்கிறார். மக்களை திசை திருப்புவதற்காக இந்த வார்த்தையை அவர் பயன்படுத்தியுள்ளார் எனவும்,

இந்த விவகாரத்தில் தமிழக அரசு வெளியிட்ட அறிக்கையில் காவல் ஆய்வாளர் மீது எந்த தவறும் இல்லை அவர் மீது எந்த நடவடிக்கையும் எடுக்கப்படவில்லை என கூறப்பட்டது. ஆனால் இப்போது எஸ்.ஐ.டி ஒரு அதிகாரியை கைது செய்துள்ளது. எவ்வாறு மாநில அரசு பொய்யான தகவல் அறிக்கையை கொடுக்க முடியும் என கேள்வி அனுப்பினார். 

மேலும், திருப்பூர் மாவட்டம் பல்லடம் அருகே மூவர் கொடூரமாக கொலை செய்யப்பட்ட விவகாரத்தில் சிபிஐ விசாரணை வேண்டும், அதுவே தீர்வு என இன்று பாஜக சார்பில் போராட்டம் நடத்த உள்ளதாகவும் தெரிவித்தார். 

டங்ஸ்டன் திட்டத்திற்கு அனுமதி வழங்கப்படாது என மத்திய அரசை கூறியுள்ளது. மேலும், மாநில அரசு இதில் முடிவு எடுக்க வேண்டும், அதற்கு எந்த நிர்பந்தமும் இல்லை எனவும் மத்திய அரசு கூறியுள்ளது. எனவே இந்த விவகாரத்திற்கு முற்றுப்புள்ளி வைக்க வேண்டிய முதல்வர் ஸ்டாலின் அதை செய்யாமல் உள்ளார். மூத்த அமைச்சர்களை மதுரைக்கு அனுப்பி மக்களோடு பேசி இருந்ததால் இந்த மாபெரும் ஊர்வலம் நடைபெற்று இருக்காது என கூறினார்.

பெரியார் குறித்து நாம் தமிழர் கட்சி தலைவர் சீமான் பேசியது குறித்த கேள்விக்கு பதில் அளித்தவர், பெரியார் அவ்வாறு பேசியதற்கான ஆவணங்கள் என்னிடம் உள்ளது. அதைக் கொடுக்க தயாராக இருக்கிறேன். ஆனால் அதை இப்போது பொதுவெளியில் பேச வேண்டியதில்லை என கருதுகிறேன். காரணம் பொதுமக்கள் இப்போது அரசியலை மற்றொரு கண்ணோட்டத்தில் பார்க்கத் துவங்கியுள்ளனர். பெரியார் பேசியதை எல்லாம் இப்போது பேசினால் அது மக்களுக்கு அருவருப்பை தரும். அதே நேரத்தில் சீமான் அவர்களிடம் விசாரணைக்காக காவல்துறையினர் வந்தால் பெரியார் பேசியதற்கான ஆவணங்களை வழங்கவும் தயாராக உள்ளேன் எனக் கூறினார்.