#BIG NEWS : கங்கை ஆற்றில் படகு கவிழ்ந்து 11 பேர் பலி..!!

பிஹார் மாநிலம் வைஷாலி மாவட்டம் ரகோபூர் அருகே கங்கா நதியில் 15 முதல் 20 பேருடன் சென்ற நாட்டுப் படகு செவ்வாய்க்கிழமை இரவு கவிழ்ந்து விபத்துக்குள்ளானதில், குறைந்தது 11 பேர் உயிரிழந்திருக்கலாம் என்று அஞ்சப்படுகிறது. பலத்த காயமடைந்தவர்களில் 5 பேர் மேல் சிகிச்சைக்காக பாட்னா மருத்துவக் கல்லூரி மருத்துவமனைக்கு (PMCH) அனுப்பி வைக்கப்பட்டுள்ளனர்.

இறுதி சடங்கு விருந்துக்குச் சென்றபோது நேர்ந்த விபரீதம்:

ரகோபூர் காவல் நிலைய எல்லைக்குட்பட்ட ராம்பூர் ஷியாம்சந்த் கிராமத்தின் அருகே செவ்வாய்க்கிழமை இரவு 8 மணியளவில் இந்த விபத்து நிகழ்ந்துள்ளது. பாதிக்கப்பட்டவர்கள் நதியைக் கடந்து இறுதிச் சடங்குக்குப் பிந்தைய விருந்து ஒன்றில் கலந்து கொள்ளச் சென்றபோது இந்தத் துயரம் நடந்துள்ளது. முதற்கட்ட அறிக்கைகளின்படி, விபத்தில் சிக்கியவர்களில் பெரும்பாலானோர் இளைஞர்களும் சிறுவர்களும் ஆவர்.

படகின் கொள்ளளவை விடக் கூடுதலாக ஆட்களை ஏற்றிச் சென்றதே படகு கட்டுப்பாட்டை இழந்து நதியின் நடுப்பகுதியில் கவிழக் காரணம் என்று உள்ளூர்வாசிகள் தெரிவித்தனர். படகு கவிழ்ந்ததும், அதில் பயணித்தவர்கள் ஆழமான நீரில் தத்தளித்து மூழ்கத் தொடங்கினர். சிலா் நீந்திப் பாதுகாப்பாக கரையை அடைந்தனர்.

காவல்துறையினர் மற்றும் உள்ளூர் நீச்சல் வீரர்களின் உதவியுடன், பெருக்கெடுத்து ஓடும் நதியிலிருந்து 10 பேரின் உடல்கள் மீட்கப்பட்டதாகத் தெரிவிக்கப்பட்டுள்ளது. உடல்கள் உடற்கூறாய்வுக்காக அரசு மருத்துவமனைக்குக் கொண்டு செல்லப்பட்டன. உயிரிழந்தவர்களின் அடையாளங்களைக் கண்டறியும் பணிகள் தீவிரமாக நடைபெற்று வருகின்றன.