ரூ.634 கோடி ஊழல் புகாரில் எனக்கு தொடர்பா? விளக்கம் அளித்த ஜனனி அசோக்குமார்!

திமுக ஆட்சி காலத்தில் நகராட்சி நிர்வாக துறையில், 2,538 உதவி பொறியாளர்கள் மற்றும் இளநிலை பொறியாளர்கள் உள்ளிட்ட அதிகாரிகள் நியமனத்துக்கு 634 கோடி ரூபாய் லஞ்சம் பெறப்பட்டுள்ளதாகவும், இது தொடர்பாக வழக்குப்பதிவு செய்யும்படி, தமிழக டிஜிபி-க்கு, அமலாக்கத் துறை கடிதம் அனுப்பியிருந்தது.

வழக்குப்பதிவு செய்ய லஞ்ச ஒழிப்புத் துறைக்கு உத்தரவிடக் கோரி அதிமுக எம்.பி. ஐ.எஸ்.இன்பதுரை தாக்கல் செய்த வழக்கை விசாரித்த சென்னை உயர் நீதிமன்றம், அமலாக்கத் துறை கடிதத்தின் அடிப்படையில் உடனடியாக வழக்குப் பதிவு செய்ய லஞ்ச ஒழிப்புத் துறைக்கு கடந்த பிப்ரவரி மாதம் உத்தரவிட்டிருந்தது.

இதனை தள்ளுபடி செய்ய கே.என். நேரு தரப்பில் வழக்குத் தொடரப்பட்டிருந்தது. இந்த வழக்கில் சமீபத்தில் தீர்ப்பளித்த தலைமை நீதிபதி அமர்வு, உத்தரவை மறு ஆய்வு செய்ய மறுத்து, நேருவின் மனுவை தள்ளுபடி செய்தது.

ரூ.634 கோடி பணியிட நியமன முறைகேடு புகார் தொடர்பாக முன்னாள் அமைச்சர் கே.என்.நேரு உள்ளிட்டோருக்கு எதிராக லஞ்ச ஒழிப்புத்துறை வழக்குப்பதிவு செய்துள்ளது. இந்த வழக்கின் தொடர்ச்சியாக திருச்சி, சென்னை, கோவை, நாமக்கல் உள்ளிட்ட பல்வேறு இடங்களில் சோதனைகளும் நடத்தப்பட்டன. இந்தச் சோதனைகளில் 170 ஆவணங்கள், 13 மின்னணு சாதனங்கள் பறிமுதல் செய்யப்பட்டதாக போலீஸார் தெரிவித்துள்ளனர்.

சென்னை மாநகராட்சி டெண்டர்கள் மூலமாகப் பெருமளவில் பணம் சம்பாதிக்கப்பட்டதாகவும், அதன் மூலம் கிடைத்ததாகக் கூறப்படும் கமிஷன் பணம் ECR பகுதியில் பல்வேறு தொழில் நிறுவனங்களில் முதலீடு செய்யப்பட்டதாகவும் குற்றம்சாட்டப்பட்டுள்ளது.

குறிப்பாக, ECR பகுதியில் துணிக்கடைகள், ஸ்வீட் கடைகள், ஹோட்டல்கள் உள்ளிட்ட பல்வேறு நிறுவனங்களுக்கு வட்டிக்குப் பணம் கொடுத்து, அதன் மூலம் பெருமளவில் வருமானம் ஈட்டப்பட்டதாகக் குற்றச்சாட்டுகள் முன்வைக்கப்படுகின்றன.

இந்த விவகாரத்தில்தான் தற்போது சின்னத்திரை நடிகைகளின் பெயர்களும் அடிபடுவதால் சமூக வலைதளங்களில் பேசுபொருளாகியுள்ளன. அதாவது, சின்னத்திரை நடிகைகளின் வங்கிக் கணக்குகள் பணப் பரிமாற்றம் நடந்திருப்பதாக வெளியாகி இருக்கும் தகவல் சின்னத்திரை வட்டாரத்தில் பரபரப்பை ஏற்படுத்தியுள்ளன.

கே.என்.நேருவின் சகோதரர் கே.என்.ரவிச்சந்திரனின் உதவியாளர் கவிபிரசாத் மற்றும் செல்வமணி ஆகியோர் மூலமாகப் பல்வேறு தொகைகள் நடிகைகளின் வங்கிக் கணக்குகளுக்கு கமிஷன் அடிப்படையில் செலுத்தப்பட்டதாகக் கூறப்படுகிறது.

குறிப்பாக, சின்னத்திரை நடிகை ஜனனி அசோக்குமார், 'செம்பருத்தி' தொடர் புகழ் ஷபானா உள்ளிட்ட சில நடிகைகளின் வங்கிக் கணக்குகளுக்கு இந்தப் பணம் அனுப்பப்பட்டதாகவும், பின்னர் அந்தப் பணம் வேறு வங்கிக் கணக்குகளுக்கு மாற்றப்பட்டதாகவும் சமூக வலைத்தளங்களில் பரவி வருகின்றன.

இந்த வழக்கில் சின்னதிரை நடிகையான ஜனனி அசோக்குமாருக்கு தொடர்பாக இருப்பதாக சமூக வலைத்தளங்களில் பரவிய நிலையில் தற்போது இது குறித்து விளக்கம் அளித்துள்ளார். அவர் வெளியிட்டுள்ள அறிக்கையில் கூறியிருப்பதாவது,

"கடந்த இரண்டு நாட்களாக, குறிப்பாக எக்ஸ் (X), இன்ஸ்டாகிராம் உள்ளிட்ட சமூக வலைதளங்களில், ரூ.634 கோடி மோசடி தொடர்பான குற்றச்சாட்டுகளுடன் எனது பெயரை இணைத்துப் பதிவுகள் மற்றும் செய்திகள் பரவி வருகின்றன. இது குறித்து விளக்கம் அளிப்பது அவசியம் என்று கருதுகிறேன்.

இந்த விவகாரத்தில் எனக்குத் தொடர்பு இல்லை என்பதைத் தெளிவுபடுத்த விரும்புகிறேன். நான் எப்போதும் அரசியலில் இருந்து விலகியே இருந்திருக்கிறேன். எந்தவொரு அரசியல் கட்சியுடனும் எனக்குத் தொடர்பு இருந்ததில்லை. அரசியல்வாதிகளுடன் தனிப்பட்ட நட்பையும் நான் பேணியதில்லை. என்னைப் பற்றி தற்போது பரப்பப்படும் குற்றச்சாட்டுகள் உண்மைக்குப் புறம்பானவை. அவை நான் வாழ்ந்து வந்த வாழ்க்கையைப் பிரதிபலிக்கவில்லை.

எனக்கு ஒரு கேள்வி இருக்கிறது. உண்மைகளை முதலில் உறுதிப்படுத்தாமல், குற்றச்சாட்டுக்கு உள்ளாக்கப்படும் நபரிடம் விளக்கம் கேட்காமல், ஆதாரப்பூர்வமான தகவல்களை முன்வைக்காமல் இவ்வளவு தீவிரமான குற்றச்சாட்டுகளை எப்படிச் செய்தியாக வெளியிடவும், பரப்பவும் முடியும்? இதில் எங்கே இருக்கிறது நியாயம்?

துல்லியமான தகவல்களை மக்களிடம் கொண்டு சேர்க்க வேண்டிய பொறுப்பு பத்திரிகைத் துறைக்கு இருக்கிறது. ஒருவரின் பெயரையோ புகைப்படத்தையோ ஒரு குற்றச்சாட்டுடன் இணைத்துப் பரப்புவது அவருக்குப் பெரும் பாதிப்பை ஏற்படுத்தக்கூடும். ஒரு விவகாரம் குறித்து விசாரணை நடத்த வேண்டும் என்ற கோரிக்கை எழுவது மட்டுமே ஒருவர் தவறு செய்துவிட்டார் என்பதற்கான ஆதாரமாகிவிடாது.

பல ஆண்டுகளாக இந்தத் துறையில் கடினமாக உழைத்து, கண்ணியத்துடன் எனது வாழ்க்கையை உருவாக்கியிருக்கிறேன். எந்தவொரு ஆதரவையும் நம்பியிருக்காமல், அடிமட்டத்திலிருந்து எனது வாழ்க்கையையும் தொழிலையும் கட்டமைத்திருக்கிறேன்.

இந்தக் குற்றச்சாட்டுகள் என்னுள் சில கேள்விகளை எழுப்புகின்றன. சுயமாக ஒரு பெண்ணாக வளர்ந்து, எதையும் புதிதாகத் தொடங்கி ஒரு தொழிலை உருவாக்கி, கண்ணியத்துடன் வாழ்வதற்காக இவ்வளவு போராடுவதில் என்ன அர்த்தம் இருக்கிறது? இணையத்தில் மீண்டும் மீண்டும் பரப்பப்படும் ஒரு பொய்யான செய்தி, இத்தனை ஆண்டுகால உழைப்பையும் நற்பெயரையும் மறைத்துவிட முடியுமென்றால், இதற்கெல்லாம் என்ன அர்த்தம்?

ஒருவரைப் பற்றியோ, அவரது உண்மை நிலையைப் பற்றியோ எதுவும் தெரியாமல், இணையத்தில் பரவலாகப் பகிரப்படும் தகவல்களைப் பார்த்தே பலரும் அவற்றை உண்மை என நம்பிவிடுகிறார்கள். என்னை அறிந்தவர்களுக்கு இந்தக் குற்றச்சாட்டுகள் பொய்யானவை என்பது தெரியும்.

ஒவ்வொரு முறையும் என்னை நிரூபித்துக்கொண்டே இருக்க வேண்டியிருப்பது வேதனையாகவும் சோர்வாகவும் இருக்கிறது. இப்போதைக்கு யாரிடமும் எனது வாழ்க்கையை நியாயப்படுத்த நான் விரும்பவில்லை.

எந்தவொரு பெண்ணையும் பற்றிய உண்மைகளைப் புரிந்துகொள்வதற்கு முன்பே, அவருக்கு முத்திரை குத்தவும், அவர் மீது பழி சுமத்தவும் இந்தச் சமூகம் எவ்வளவு விரைவாகத் தயாராக இருக்கிறது என்பதுதான் என்னை மிகவும் வேதனைப்படுத்துகிறது.

எனவே, ஊடக நிறுவனங்களும், இணையத்தில் பதிவுகளைப் பகிரும் அனைவரும், எந்தவொரு தகவலையும் வெளியிடுவதற்கு அல்லது பகிர்வதற்கு முன்பு அதன் உண்மைத்தன்மையைச் சரிபார்க்க வேண்டும் என்று கேட்டுக்கொள்கிறேன். என்னை இந்த விவகாரத்துடன் தவறாகத் தொடர்புபடுத்தும் பதிவுகளைத் திருத்தவோ அல்லது நீக்கவோ வேண்டும். ஒரு குற்றச்சாட்டை நிரூபிக்கப்பட்ட உண்மையாகக் கருத வேண்டாம்.

இந்தக் கடினமான சூழலில் நிதானத்துடனும், நியாயத்துடனும், அக்கறையுடனும் நடந்துகொண்ட அனைவருக்கும் எனது நன்றி. நீங்கள் காட்டும் அன்பும் ஆதரவும் எனக்கு எவ்வளவு முக்கியமானவை என்பதை வார்த்தைகளால் விவரிக்க முடியாது" என்று விளக்கம் அளித்துள்ளார்.