"கேக்கு தரீயா இல்ல கடைய அடிச்சு நொறுக்கவா?"- பேக்கரியை அடித்து உடைத்து அட்டகாசம் செய்த அதிமுக பிரமுகர்
திருவள்ளூரில் இலவசமாக கேக் கேட்டு கடையின் உரிமையாளரை அதிமுக பிரமுகர் கூட்டாளிகளுடன் சேர்ந்து தாக்குதல் நடத்தியுள்ள சம்பவம் பரபரப்பையை ஏற்படுத்தி உள்ளது.
திருவள்ளுர் அடுத்த காக்களூர் சிக்னல் பகுதியில் குன்னவலம் பகுதியைச் சேர்ந்த உமா காந்த் என்பவர் கடந்த நான்கு ஆண்டுகளாக கேக் கடை வைத்து நடத்தி வருகிறார். இந்த கடைக்கு கடந்த மாதம் திருவள்ளுர் அடுத்த சேலை பகுதியைச் சேர்ந்த வழக்கறிஞரும் அதிமுக பிரமுகருமான ராஜேஷ் என்பவர் 1000 ரூபாய் மதிப்பில் ஆர்டர் கொடுத்து பிறந்தநாள் கேக் வாங்கி உள்ளார். அவர் வாங்கிய கேக்குக்கு கூகுள் பே மூலம் அனுப்புவதாக தெரிவித்து கூகுள் பே சரியாக வேலை செய்யவில்லை எனக் கூறி வீட்டிற்கு சென்று பின்னர் அனுப்புவதாக அவருடைய செல்போன் எண் கொடுத்துவிட்டு சென்றுள்ளார்.
கடை உரிமையாளர் அவருக்கு தொலைபேசி மூலமாக ஒரு மாதமாக ஆயிரம் ரூபாய் கேட்டு போன் செய்து வந்துள்ளார். ஆனால் ராஜேஷ் ஆயிரம் ரூபாய் தன்னிடமா கேட்கிறாய் நீ அங்கு கடை வைத்து நடத்த முடியாது காலி செய்து விடுவேன் என போனில் மிரட்டல் செய்துள்ளார். இந்த நிலையில் நேற்று மீண்டும் அதே கேக் கடைக்கு 1000 ரூபாய் மதிப்பில் கேக்குக்கு ஆர்டர் செய்து அதை வாங்கி வருவதற்கு அவருடைய கூட்டாளியை அனுப்பி வைத்துள்ளார். ராஜேஷ் கடை உரிமையாளருக்கு போன் செய்து கேக்கை அவரிடம் கொடுத்து அனுப்புமாறு கூறியுள்ளார். ஆனால் கடை உரிமையாளர் ஏற்கனவே 1000 ரூபாய் கேக் வாங்கியதற்கான பணம் தர வேண்டியது உள்ளது, அதனால் பணத்தை கொடுத்து கேக்கை பெற்று செல்லுங்கள் கடையின் உரிமையாளர் கூறியுள்ளார்.
இதனால் ஆத்திரமடைந்த ராஜேஷ் தனது நண்பரான புங்கத்தூர் பகுதியைச் சேர்ந்த பகுஜன் சமாஜ் கட்சியின் நிர்வாகி ரவி மற்றும் நான்கு பேரை கடைக்கு அழைத்து சென்றுள்ளார். அப்போது ராஜேஷ் தனது கூட்டாளியான ரவியுடன் கடையின் கிளாஸ் டோரை திறந்து கொண்டு வந்து அநாகரிமான பேசி கல்லாப்பெட்டியை தள்ளிவிட்டு கடை உரிமையாளரான உமாகாந்தை இரண்டு முறை கையால் தாக்கியுள்ளார். தாக்குதல் முடிந்த பிறகு ராஜேஷ் ஏற்கனவே வாங்கியதற்கான கேக்குக்கான 1000 ரூபாய் பணத்தில் 600 ரூபாய் கொடுத்து தற்போது ஆர்டர் கொடுத்த கேக்கை இலவசமாக கேட்டுள்ளார். ஆனால் கடை உரிமையாளர் பணத்தைப் பெற்றுக் கொண்டு, ஏற்கனவே வாங்கிய கேக்குக்கான மீதி தொகை 400 ரூபாய் தற்போது வாங்கக்கூடிய கேக்குக்கு ஆயிரம் என சேர்த்து 1400 ரூபாய் கேட்டுள்ளார். ஆனால் அந்த பணத்தை தர மறுத்த ராஜேஷ், தனது கூட்டாளியுடன் கடை உரிமையாளருக்கு கொலை மிரட்டல் விடுத்து அங்கிருந்து சென்றுள்ளார்
"கேக்கு தரீயா இல்ல கடைய அடிச்சு நொறுக்கவா?.. நீ எனக்கு கேக் தரலனா என் ஊருல யாரு என்ன மதிப்பா?".. முதல் தடவை கேக்கை வாங்கிவிட்டு வீட்டுக்கு சென்று Gpay பண்ணுவதாக சென்ற அரசியல் பிரமுகர், பணத்தை அனுப்பாத நிலையில் மீண்டும் ஓசியில் கேக் கேட்டு ரகளை.. பேக்கரியை அடித்து உடைத்து… pic.twitter.com/WwNyXrLqj5
— Polimer News (@polimernews) March 5, 2025
‘நாங்க லோக்கல் ஏரியா ஆள்... என்பதால் நீ எங்களுக்கு இலவசமாக கேக்கு தர வேண்டும் இல்லையென்றால் கடை இருக்காது’ எனக் கூறி மிரட்டி சென்றுள்ளனர். கடையில் தாக்குதல் நடத்திய சிசிடிவி வீடியோவை வைத்து கடை உரிமையாளர் திருவள்ளூர் டவுன் போலீசில் நேற்றைய தினம் புகார் அளித்துள்ளார். ஆனால் அவர் கொடுத்த புகாரை போலீசார் வாங்கிக்கொண்டு அவர் வழக்கறிஞர் என்பதால் எந்தவித விசாரணையும் செய்யாமல் இருந்து வந்ததாக கூறப்படுகிறது. இந்நிலையில் கடை உரிமையாளரை அதிமுக பிரமுகர் கூட்டாளிகளுடன் சென்று தாக்கும் சிசிடிவி காட்சிகள் செய்திகளில் ஒளிபரப்பு செய்யப்பட்டதால், அரை மணி நேரத்தில் போலீசார் அவருடைய கடைக்கு வருகை தந்து அவரிடம் நடந்த சம்பவம் குறித்து கேட்டறிந்தனர்
தாக்குதல் நடத்திய ராஜேஷ் சேலை முன்னாள் ஊராட்சி மன்ற துணைத் தலைவரும் வழக்கறிஞரும் அதிமுக பிரமுகரமாக செயல்பட்டு வருகிறார். தாக்குதல் நடத்திய புங்கத்தூர் ரவி மீது ஏற்கனவே கொலை முயற்சி வழக்கு நிலுவையில் இருப்பது குறிப்பிடத்தக்கது