வீட்டில் மலை போல் குவிந்த 7 மூட்டை கடிதங்கள்..! தபால்களை டெலிவரி செய்யாமல் பதுக்கிய திருப்பூர் போஸ்ட்மேன்..!

திருப்பூர் கோட்டத்திற்கு உட்பட்ட காங்கேயம் பகுதியில் தபால்காரராகப் பணியாற்றி வந்த செந்தில்குமார், பொதுமக்களின் கடிதங்களை முறையாக ஒப்படைக்கவில்லை. அவர் தனது வீட்டில் 7 பெரிய மூட்டைகளில் தபால்களைப் பதுக்கி வைத்திருந்தது கண்டுபிடிக்கப்பட்டு, அவை அதிகாரிகளால் பறிமுதல் செய்யப்பட்டன.

திருப்பூர் மாவட்டம் காங்கேயத்தைச் சேர்ந்தவர் செந்தில்குமார். இவர் அப்பகுதியில் போஸ்ட்மேனாகப் பணியாற்றி வந்தார். இந்நிலையில், இவர் பொதுமக்களுக்குச் சேர வேண்டிய தபால்களை உரிய முறையில் விநியோகிக்காமல், தனது வீட்டில் ரகசியமாகப் பதுக்கி வைத்துள்ளதாகத் தபால் துறை உயர் அதிகாரிகளுக்குப் புகார்கள் சென்றன.

7 மூட்டைகள் மீட்பு:

இந்த புகாரின் அடிப்படையில், திருப்பூர் மாவட்ட தபால் துறை உயர் அதிகாரிகள் காங்கேயத்தில் உள்ள செந்தில்குமாரின் வீட்டிற்குச் சென்று அதிரடி சோதனை நடத்தினர். அப்போது அவரது வீட்டில் மலை போல் குவிந்து கிடந்த 7 மூட்டை தபால்களைக் கண்டு அதிகாரிகள் அதிர்ச்சியடைந்தனர். மீட்கப்பட்ட 7 மூட்டை கடிதங்களும் உடனடியாக ஓர் ஆட்டோ மூலம் தபால் நிலையத்திற்குப் பாதுகாப்பாக எடுத்துச் செல்லப்பட்டன.

பொதுமக்களின் ஆதார் கார்டு, வங்கி ஆவணங்கள், நேர்முகத் தேர்வு கடிதங்கள் உள்ளிட்ட பல முக்கிய ஆவணங்களை விநியோகிக்காமல் பதுக்கிய தபால்காரரின் இந்தச் செயலால் அப்பகுதி மக்கள் கடும் கொந்தளிப்படைந்தனர். சம்பந்தப்பட்ட தபால்காரர் மீது கடுமையான நடவடிக்கை எடுக்க வேண்டும் என்று பொதுமக்கள் தரப்பில் கோரிக்கைகள் எழுந்தன.

அதிரடி சஸ்பெண்ட்:

பொதுமக்களின் கோரிக்கையையும், முறைகேட்டையும் அடுத்து, தபால்களை பதுக்கிய தபால்காரர் செந்தில்குமாரைப் பணியிடை நீக்கம் செய்து திருப்பூர் கோட்ட தலைமை தபால் கண்காணிப்பாளர் அதிரடி உத்தரவிட்டுள்ளார்.

இதுகுறித்து தபால் துறை அதிகாரிகள் தரப்பில் கூறும்போது, "பணியிடை நீக்கம் செய்யப்பட்டுள்ள செந்தில்குமார் மீது விரைவில் துறைரீதியான கடுமையான விசாரணை நடத்தப்படும். மேலும், அவரது வீட்டில் இருந்து மீட்கப்பட்ட தபால்கள் அனைத்தும் தரம் பிரிக்கப்பட்டு, இன்னும் ஓரிரு நாட்களில் உரிய பொதுமக்களிடம் பாதுகாப்பாக ஒப்படைக்கப்படும்" என்று தெரிவித்துள்ளனர். இச்சம்பவம் திருப்பூர் பகுதியில் பெரும் பரபரப்பை ஏற்படுத்தியுள்ளது.