`மதுரை சிறையில் தனி வீடு; தேடி வரும் விருந்து சாப்பாடு!’- சாத்தான்குளம் போலீஸ் கைதிகள் சொகுசு வாழ்க்கை

சாத்தான்குளத்தில் தந்தை, மகன் காவல் நிலையத்தில் அடித்துக் கொல்லப்பட்ட வழக்கில் கைது செய்யப்பட்ட போலீஸ் கைதிகள் 5 பேருக்கும் மதுரை மத்திய சிறையில் தனி வீடு வழங்கப்பட்டுள்ளதோடு, சாப்பாடு அவர்களை தேடி வருகிறது. சிறையில் அவர்கள் சொகுசு வாழ்க்கை வாழ்ந்து வருவது சர்ச்சையை ஏற்படுத்தி உள்ளது.

தூத்துக்குடி மாவட்டம், சாத்தான்குளத்தில் செல்போன் கடை நடத்திவந்த பென்னிக்ஸ் அவரது தந்தை ஜெயராஜ் ஆகிய இருவரையும் விசாரணை என்ற பெயரில் காவல் நிலையத்தில் வைத்து அடித்து கொலை செய்ததாக 5 காவல்துறையினர் மீது சிபிசிஐடி வழக்குபதிவு செய்தது. இதைத் தொடர்ந்து இன்ஸ்பெக்டர் ஸ்ரீதர், சப்-இன்ஸ்பெக்டர்கள் ரகுகணேசன், பாலகிருஷ்ணன், ஏட்டு முருகன், காவலர் முத்துராஜ் ஆகியோர் கைது செய்யப்பட்டு தூத்துக்குடி பேரூரணியில் உள்ள மாவட்ட சிறையில் அடைக்கப்பட்டனர்.

இந்த நிலையில், சிறையில் உள்ள கைதி ஒருவரால் தங்களின் உயிருக்கு ஆபத்து இருப்பதாக கூறி 5 போலீஸ் கைதிகளும் அங்கிருந்து மதுரை சிறைக்கு மாற்ற கோரினர். இதையடுத்து 5 பேரும் பாதுகாப்புடன் மதுரை மத்திய சிறைக்கு மாற்றப்பட்டனர். இந்த நிலையில், சொகுசான வசதிசெய்து கொடுப்பதற்காகவே பாதுகாப்பு குறைப்பாடு என கூறி 5 பேரையும் மதுரை மத்திய சிறைக்கு மாற்றி இருப்பதாக வழக்கறிஞர்கள் குற்றம்சாட்டி இருந்தனர்.

இந்த நிலையில், மற்ற கைதிகளை போல சிறைக்குள் அடைக்கப்படாமல், கொரோனா முகாமில் தனிமைப்படுத்தி வைத்திருப்பது போல மத்திய சிறைக்குள் இருக்கின்ற வீடு ஒன்று கொலை வழக்கில் கைதான இந்த 5 போலீஸ் கைதிகளுக்கும் ஒதுக்கப்பட்டிருப்பதாக தகவல் வெளியாகி உள்ளது. அவர்களுக்கு விருந்து சாப்பாடு வழங்கப்பட்டு வருவதாகவும் கூறப்படுகிறது. தந்தை, மகனை கொன்றுவிட்டு சிறையில் இருக்கும் 5 காவலர்கள் சொகுசு வாழ்க்கை வாழ்ந்து வருவது பெரும் சர்ச்சையையும் அதிர்ச்சியையும் ஏற்படுத்தியுள்ளது.