கொரோனா வைரஸ் இரண்டாம் அலை நாடு முழுவதும் வேகமாக பரவி வருகிறது. இம்மாத தொடக்கத்தில் 10 ஆயிரமாக இருந்து வந்த பாதிப்பு தற்போது 4 மடங்கு அதிகரித்துள்ளது. கடந்த 24 மணி நேரத்தில் 47 ஆயிரம் பேர் கொரோனா தொற்றுக்கு ஆளாகியுள்ளனர். 270 பேர் உயிரிழந்துள்ளனர். இவ்வாறு பாதிப்பு மீண்டும் தலைதூக்குவதால் லாக் டவுன் அமல்படுத்தப்பட வாய்ப்பு இருப்பதாக கூறப்படுவது மக்களை அதிர்ச்சி அடையச் செய்துள்ளது.
தமிழகம், மகாராஷ்டிரா, கேரளா உள்ளிட்ட 6 மாநிலங்களில் தான் அதிகளவில் பாதிப்பு பரவி வருகிறதாம். நாளொன்றுக்கு பதிவாகும் பாதிப்பில் கிட்டத்தட்ட 80% அம்மாநிலங்களில் இருந்தே பதிவாகிறதாம். இதனால் அந்தந்த மாநில அரசுகள் தீவிர நடவடிக்கையை கையாண்டு வருகின்றன. இந்த நிலையில், புதுச்சேரியில் 5 மாதங்களுக்கு பிறகு கொரோனா பாதிப்பு 100க்கு மேல் பதிவாகி இருப்பதாக சுகாதாரத்துறை அறிவித்துள்ளது.
புதுச்சேரியில் புதிதாக 126 பேருக்கு கொரோனா உறுதியான நிலையில், 2 பேர் கொரோனாவுக்கு பலியாகியுள்ளனர். அங்கு மொத்தம் 40,645 பேர் கொரோனாவால் பாதிக்கப்பட்டுள்ளனர். 679 பேர் உயிரிழந்த நிலையில், 39,380 பேர் குணமடைந்து வீடு திரும்பியுள்ளனர் என்பது குறிப்பிடத்தக்கது.