ஆண்டுதோறும் தை மாதம் முதல் நாள் தமிழர்களின் பாரம்பரிய பண்டிகையான பொங்கல் பண்டிகை கொண்டாடப்பட்டு வருகிறது. தொடர்ச்சியாக 3 நாட்கள் பொங்கல் விழா கொண்டாடப்படுவது வழக்கம்.
இயற்கைக்கு நன்றி சொல்லும் விதமாக முதல்நாள் சூரிய பொங்கல் கொண்டாடப்படுகிறது. இதில் புதுப்பானையில், அரிசி, வெல்லம் இட்டு பொங்கல் வைத்து சூரியனுக்கு படைத்து நன்றி தெரிவிக்கப்படும். இரண்டாம் நாளான மாட்டுப் பொங்கல் தினத்தன்று , விவசாயத்திற்கு பெரிதும் உதவியாக இருக்கும் மாடுகளை அலங்கரித்து பொங்கல் வைத்து அதற்கு உணவு படைக்கும் நிகழ்ச்சி நடைபெறும். மூன்றாவது நாள் உறவுகளை கண்டு மகிழும் விதமாக காணும் பொங்கல் கொண்டாடப்படுகிறது.
பொங்கல் விழா என்றதும் நினைவுக்கு வரும் மற்றொரு நிகழ்ச்சி ஜல்லிக்கட்டு. தமிழகத்தில் இந்தாண்டு ஜல்லிக்கட்டு நடத்த அரசு அனுமதி அளித்துள்ள நிலையில் அதற்கான ஏற்பாடுகள் ஒருபுறம் நடைபெற்று வருகிறது.
இந்நிலையில் இந்த ஆண்டு ஜனவரி 14ஆம் தேதி வியாழக்கிழமை தை பொங்கல் கொண்டாடப்படுகிறது. அதே போல் ஜனவரி 15 ஆம் தேதி மாட்டுப் பொங்கலும் , 16 ஆம் தேதி காணும் பொங்கலும் கொண்டாடப்படுகிறது. தை 1 ஆம் நாள் (ஜனவரி 14) காலை 10.30 – 12 மணி வரை பொங்கல் வைக்க உகந்த நல்ல நேரமாக உள்ளது. எமகண்டம் காலை 6 மணி முதல் 7.30 மணி வரையும், ராகு காலம் மதியம் 1.30 மணி முதல் 3 மணி வரையும் இருக்கும். இதனால் எமகண்டம், ராகு காலத்தின் போது பொங்கல் வைப்பதை தவிர்க்கலாம்.