திமுகவின் அண்டப்புளுகு, ஆகாசப்புளுகு! தற்போது திராவிட மாடல் புளுகு! பாஜக விமர்சனம்
திமுக எதிர்க்கட்சியாக இருந்தபோது சட்டமன்றத்தில் 8 வழிச்சாலை குறித்து பேசிய முதல்வர் முக ஸ்டாலின், “ திமுக சாலை போடுவதற்கு எதிரி அல்ல. விவசாயிகளை அழைத்துப்பேசி, அவர்களுக்கு என்ன தேவை என்று புரிந்துகொண்டு பிரச்சனையை தீர்த்துவிட்டு சாலையைப் போடுங்கள். 8 வழிச்சாலை போடக்கூடாது என எந்த காலத்திலும் திமுக சொல்லவே இல்லை” என்று கூறியதாக அமைச்சர் எ.வ.வேலு இன்று செய்தியாளர்களிடம் கூறினார்.
இதனை விமர்சித்துள்ள பாஜகவை சேர்ந்த நாராயணன் திருப்பதி, “8 வழிச்சாலை போடக்கூடாது என எந்த காலத்திலும் திமுக சொல்லவே இல்லை ! என கூறியிருக்கிறார் அமைச்சர் எ.வ.வேலு ! எதிர்க்கட்சியாக இருந்த போது மக்கள் நல திட்டங்களையும் , கட்டமைப்புகளை பெருக்கும் திட்டங்களையும் தொடர்ந்து எதிர்த்ததோடு , சில தீய சக்திகள் செய்த பல்வேறு கலகங்களுக்கு தன் ஆதரவையும் அளித்தது திராவிட முன்னேற்ற கழகம் . மேலும் , எதிர்க்கட்சியாக இருந்த போது , " சேலம் எட்டுவழிச்சாலை விவகாரத்தில் மீண்டும் தமிழக மக்களுக்கு துரோகம் செய்வது கடும் கண்டனத்துக்குரியது " - என்று 31/05/2019 திரு . முக ஸ்டாலின் சொன்னது உண்மையா இல்லையா ? " தேர்தல் வரை , பயத்தின் காரணமாக திட்டம் செயல்படுத்தப்படாது என்று பொய் வாக்குறுதி கொடுத்து விட்டு தேர்தல் முடிந்த பிறகு வேதாளம் முருங்கை மரம் ஏறியது போல மீண்டும் எட்டு வழி சாலை பற்றி திரு பழனிச்சாமி பிதற்ற ஆரம்பித்து விட்டார் " .- என்று டி ஆர் பாலு அவர்கள் , 13/07/2019 அன்று சொன்னது உண்மையா இல்லையா ?
மக்களின் நலனுக்காக எட்டு வழி சாலை திட்டத்தை மத்திய ய மாநில அரசு உடனே கைவிட வேண்டும்- என்று 06/06/2020 அன்று முகஸ்டாலின் அவர்கள் சொன்னது உண்மையா இல்லையா ? திமுக ஆட்சி அமைந்த பின் , '17 / 06 / 2021 அன்று மாண்புமிகு இந்திய பிரதமரிடம் மாண்புமிகு தமிழக முதலமைச்சர் முக ஸ்டாலின் அவர்கள் வழங்கிய சுருக்க உள்ளடக்க குறிப்பின் 15 ( e ) ன் படி , சென்னை - சேலம் பசுமை வழிச்சாலை திட்டத்தை கைவிட கோரி மனுவில் வலியுறுத்தப்பட்டுள்ளது ' என்று தமிழக அரசின் செய்தி வெளியீடு எண் : 292 ல் குறிப்பிடப்பட்டுள்ளதா இல்லையா ? : சேலம் எட்டு வழி சாலை என்பது மிக அவசியமான ஒன்று என்பதை நாம் தொடர்ந்து சொல்லி வருகிறோம் . எதிர்க்கட்சியாக இருந்த போது , அரசியல் லாபத்திற்காக வேண்டுமென்றே மக்களை தூண்டிவிட்டு , சில தீய சக்திகளுக்கு துணை நின்று இந்த திட்டத்தை எதிர்த்த திராவிட முன்னேற்ற கழகம் , இன்று ஆட்சியில் அமர்ந்த பின் கட்டமைப்பை பெருக்க வேண்டுமானால் , பொருளாதார வளர்ச்சி வேண்டுமானால் , தொழில்துறையில் முன்னேற்றம் வேண்டுமானால் , வேலை வாய்ப்பை பெருக்க வேண்டுமானால் எட்டு வழிச்சாலை அவசியம் என்பதை தற்போது உணர்ந்துள்ளது .
எதிர்க்கட்சியாக இருந்த போது , அண்டப்புளுகு , ஆகாசப்புளுகு என்று அடுக்கி கொண்டேயிருந்த தி மு க , இப்போது ' 8 வழிச்சாலை போடக்கூடாது என எந்த காலத்திலும் திமுக சொல்லவே இல்லை என்று சொல்வதற்கு பெயர் ' திராவிட மாடல் புளுகா ?” எனக் குறிப்பிட்டுள்ளார்.