தீவிரவாத அமைப்புகளை தடை செய்வது புத்திசாலித்தனம் இல்லை.. கோடியேறி பாலகிருஷ்ணன்

எந்தவொரு குழுவையும் தடை செய்வதன் மூலம், அந்த குழுவின் அரசியல் சித்தாந்தம் அழியாது, அது ஒரு புதிய வடிவத்தில் சமூகத்தில் மீண்டும் தலைதூக்கும் என கோடியேறி பாலகிருஷ்ணன் தெரிவித்தார்.

கேரளாவில் முதல்வர் பினராயி விஜயன் தலைமையில் இடதுசாரி கூட்டணி அரசாங்கம் நடந்து வருகிறது. அந்த மாநிலத்தில் கடந்த 5 மாதங்களில் 5 அரசியல் கொலைகள் நடந்துள்ளன. ஆலப்புழா மற்றும் பாலக்காட்டில் 3 ஆர்.எஸ்.எஸ். மற்றும் 2 பி.எப்.ஐ. தலைவர்கள் படுகொலை செய்யப்பட்டுள்ளனர். இதனால் அந்த மாநிலத்தில் எஸ்.டி.பி.ஐ. போன்ற அமைப்புகள் தடை செய்யப்படலாம் என பேச்சு எழுந்தது. ஆனால் எந்தவொரு தீவிரவாத அமைப்புகளை தடை செய்வது புத்திசாலித்தனமான யோசனையல்ல, ஏனெனில் அது புதிய பெயரில் மீண்டும் தோன்றும் என கோடியேறி பாலகிருஷ்ணன்  தெரிவித்தார். 

மார்க்சிஸ்ட் கம்யூனிஸ் கட்சியின் செயலாளர் கோடியேறி பாலகிருஷ்ணன் செய்தியாளர்களிடம் கூறியதாவது: ஒரு அமைப்பு பற்றி ஊகங்கள் உள்ளன. எந்தவொரு குழுவையும் தடை செய்வதன் மூலம், அந்த குழுவின் அரசியல் சித்தாந்தம் அழியாது, அது ஒரு புதிய வடிவத்தில் சமூகத்தில் மீண்டும் தலைதூக்கும். எஸ்.டி.பி.ஐ.-ன் வளர்ச்சியை பார்த்தோம். முன்பு என்.டி.எப். ஆகவும், அதற்கு முன் எஸ்.ஐ.எம்.ஐ. ஆகவும் இருந்தது. அது எங்கு வந்துள்ளது என்பதை நாம் இப்போது நாம் அறிவோம். பா.ஜ.க. தலைவர்கள் எஸ்.டி.பி.ஐ.யை தடை செய்ய வேண்டும் என்று கூறுகிறார்கள். 

ஆனால் அந்த வழக்கில் தடை செய்யப்பட வேண்டிய முதல் குழு ஆர்.எஸ்.எஸ்.. அறுபதுகளில் சி.பி.எம். தடை செய்யப்பட்டது. இருப்பினும் கட்சியின் தடை பின்னர் நீக்கப்பட்டது. எனவே ஒரு அமைப்பை தடை செய்வதில் எங்களுக்கு உடன்பாடு இல்லை. 2021 சட்டப்பேரவை தேர்தலில் அமோக பெரும்பான்மையுடன் மீண்டும் ஆட்சிக்கு வந்துள்ள இடதுசாரி அரசின் மதச்சார்பற்ற கட்டமைப்பை அழிக்கவும், வளர்ச்சி திட்டத்தை சிதைக்கவும் வகுப்புவாத சக்திகள் முயற்சிக்கின்றன. இவ்வாறு அவர் தெரிவித்தார்.