நவம்பரில் தினசரி உள்நாட்டு விமான பயணிகளின் எண்ணிக்கை 2 லட்சமாக அதிகரித்துள்ளது. இது தொற்று பரவலுக்கு முந்தைய கால அளவில் பாதியை அடைந்துள்ளதாக விமானப்போக்குவரத்து அமைச்சக செயலாளர் பிரதீப் சிங் கரோலா தெரிவித்துள்ளார்.
உத்தர பிரதேச மாநிலம் அமேதியில் விமானிகளுக்கான பயிற்சி மைய நிகழ்ச்சி ஒன்றில் பங்கேற்ற அவர் இதனை தெரிவித்தார். அப்போது இது குறித்து அவர் மேலும் பேசியதாவது ; கொரோனா தொற்று பரவல் காரணமாக உள்நாட்டு விமான போக்குவரத்துக்கு விதிக்கப்பட்ட 2 மாத தடை விலக்கப்பட்டு, மே மாதத்தில் மீண்டும் விமான சேவை தொடங்கப்பட்டது.
அப்போது, முதல் நாளில் நாடெங்கிலும் விமானங்களில் பயணம் செய்தவர்களின் எண்ணிக்கை 30 ஆயிரமாக இருந்தது. இது நவம்பரில் நாள் ஒன்றுக்கு 2 லட்சமாக தற்போது அதிகரித்துள்ளதாக அவர் தெரிவித்தார்.
மேலும், கொரோனா தொற்று பரவலுக்கு முன்பு வரை சராசரியாக உள்நாட்டு விமான பயணிகளின் எண்ணிக்கை தினமும் 3.5 லட்சம் முதல் 4 லட்சம் வரை இருந்ததாக குறிப்பிட்ட அவர், இந்த எண்ணிக்கையில் பாதி அளவை சில மாதங்களிலேயே அடைந்துவிட்டதாகவும் அப்போது அவர் தெரிவித்தார்.
அதேப்போல புக்கிங் 100 சதவீதம் வரை நடைபெறுவதாகவும் குறிப்பிட்ட அவர், நியூ நார்மலுக்கு ஏற்ப விரைவாக தங்களை மாற்றிக்கொண்டு பழைய நிலைக்கு பயணிகளை வர செய்தமைக்காக விமான நிறுவனங்களுக்கு பாராட்டுகளையும் தெரிவித்துக்கொள்வதாக கூறினார்.
- எஸ். முத்துக்குமார்