’இவரை உடனே நீக்குங்கள்’ கவாஸ்கர் சொல்வது யாரை?

ஆஸ்திரேலியாவில் சுற்றுப்பயணம் மேற்கொண்டுள்ளது இந்திய கிரிக்கெட் அணி. ஒரு நாள் தொடரை ஆஸ்திரேலியா வென்றாலு, டி20 தொடரை இந்தியா கைப்பற்றியது.

முதல் டெஸ்ட் போட்டியில் மிக மோசமாகத் தோற்றது இந்திய அணி. இந்தத் தோல்வியைத் தொடங்கி வைத்த பெருமை ப்ரீத்திவ் ஷாவையே சேரும். ஆமாம். அவர்தான் முதல் இன்னிங்கிஸில் 2 பந்துகளைச் சந்தித்து டக் அவுட்டானார். அதுதான் இந்தத் தொடரின் முதல் ஓவர்.

சரி, முதல் இன்னிங்ஸ்தான் இப்படி ஆயிற்று, அடுத்த இன்னிங்க்ஸில் அசத்துவார் என எதிர்பார்த்தனர். ஆனால், இரண்டாம் இன்னிங்ஸிலும் 4 பந்துகளைச் சந்தித்து 4 ரன்களை மட்டுமே அடித்து ஆட்டமிழந்து அணிக்கு பெரும் அவநம்பிக்கையைக் கொடுத்தார்.

பேட்டிங்கில் மட்டுமல்ல, பீல்டிங்கில் ஏகப்பட்ட கேட்ச்களை தவற விட்டு, மோசமான ஆட்டத்தை வெளிப்படுத்தினார்.

இந்தத் தொடருக்கு முன் ப்ரீத்திவ் ஷாவைச் சேர்க்கச் சொல்லி பல முன்னணி வீரர்களும் மூத்த வீரர்களும் பரிந்துரை செய்தனர்.ஆனால், இவரின் மோசமான ஆட்டம் எல்லோருக்கும் ஏமாற்றத்தையே தந்தது.

இந்நிலையில் இந்திய அணியின் முன்னாள் கேப்டனும் தலை சிறந்த டெஸ்ட் போட்டி கிரிக்கெட்டருமான சுனில் கவாஸ்கர் “ப்ரீத்தீவ் ஷாவின் ஆட்டத் திறன் சரியில்லை. பேட்டிங் ஆடும் முறையிலும் சிக்கல்கள் இருக்கின்றன. அதனால் அவரை உடனே நீக்க வேண்டும்” என்பதாகக் கூறியிருக்கிறார்.

விரைவில் தொடங்க இருக்கும் இரண்டாம் டெஸ்ட் போட்டியில் விராட் கோலியும் கிடையாது. மோசமான பேட்டிங் ஆர்டரும் இருந்தால் எப்படி வெற்றியை திட்டமிடுமோ இந்திய அணி.